Zgjedhje të lira dhe të ndershme, Mediu: Edi Rama ka shkatërruar çdo mundësi bashkëpunimi!

Duke bërë thirrje fillimisht për kujdes të veçantë nga pandemia e COVID-19, Kryetari i Partisë Republikane, Fatmir Mediu, para strukturave të Njësisë Nr.3 tha se zgjedhjet parlamentare të 25 Prillit kanë një rëndësi kombëtare ndërsa Edi Rama ka shkatërruar çdo mundësi mirëbesimi dhe bashkëpunimi, për zgjedhje të lira dhe të ndershme.

“Si asnjëherë më parë, nuk ka një reformë zgjedhore, për të zbatuar rekomandimet e OSBE/ODHIR-it. Me qëllim të qartë manipulimi, ai ndryshoi Kushtetutën dhe Kodin Zgjedhor pa opozitën, në kundërshtim me kërkesat e Bashkimit Europian dhe kushteve të Gjermanisë,” tha Fatmir Mediu dhe kjo është arsyeja që vendet anëtare të BE, janë kundër hapjes faktike të negociatave ndërmjet konferencës ndërqeveritare, që pritej të zhvillohej, nëse Shqipëria do të plotësonte kushtet e vendosura nga Bundestagu Gjerman.

“Ndryshimet kushtetuese që bëri Rama, nuk janë praktikë e asnjë vendi të NATOs, apo vendeve që duan të bëhen pjesë e BE. Edhe Putini, që Rama kërkon të imitojë, e ndryshoi Kushtetutën me referendum,” tha Kryetari i Partisë Republikane, Fatmir Mediu, duke shtuar se regjimi i korruptuar në pushtet, nuk ka asgjë të përbashkët me Bashkimin Europian ndërsa përfundoi:

“Bashkimi Europian është çdo gjë e kundërt me atë që ka ndërtuar Rama, është respekt për qytetarët, Kushtetutën, ligjin, institucionet, është luftë kundër korrupsionit dhe krimit, është standart ekonomik dhe social.“