“Çelësi i Tiranës” Presidentes së Kosovës: Shtatorja e Presidentit Ibrahim Rugova së shpejti në Tiranë

Shtatorja e Presidentit historik të Kosovës, Ibrahim Rugova do të vendoset së shpejti në Tiranë. Lajmi u dha nga kryetari i Bashkisë Tiranë, Erion Veliaj, pas takimit me U.D. Presidenten e Kosovës, Vjosa Osmani, ku dhe i dorëzoi “Çelësin e Qytetit”.

“Jam shumë i lumtur për vizitën në Tiranë. Dua të të dhuroj “Çelësin e Qytetit”, si simbol i një dere të hapur, si simbol i një vendi që duhet të jetë shtëpia jote, shtëpia e të gjithë shqiptarëve. Mezi pres që t’i bëjmë realitet të gjitha nismat për të cilat diskutuam sot, sidomos ato për fuqizimin e rolit të grave dhe vajzave në politikë. Jam shumë krenar për ju, për punën që po bëni dhe për gjithë energjinë pozitive në Kosovë,” tha kryetari i Bashkisë Tiranë, Erion Veliaj.

Duke bërë të ditur se Tirana do të nderojë edhe yllin e muzikës shqiptare, Nexhmije Pagarusha, emrin e së cilës tashmë e mban edhe një kopësht me pemë në Parkun e Liqenit Artificial, Presidentja e Kosovës falënderoi Erion Veliajn për mikpritjen i dhuroi një kristal prej minierës së Trepçës

“Tirana është e të gjithë shqiptarëve, prandaj edhe përgjegjësia juaj është e shumëfishtë në krahasim me çdo kryetar komune kudo në Kosovë, në Shqipëri, apo edhe në vende të tjera ku banojnë dhe jetojnë shqiptarët. Presim që bashkëpunimin ta rrisim jo vetëm ndërmjet Prishtinës dhe Tiranës, por presim që të shërbeni si shembull, edhe për komunat e tjera, për arritjet në çdo fushë,” tha U.D. Presidentja e Kosovës, Vjosa Osmani.