I preku Vuçiçin, përgjigjet Edi Rama: Groteske! Nëse për znj.Vjosa atdheu është Kosova dhe Shqipëria, atëherë…

Ekonomia ishte në fokus të Kryeministrit Edi Rama edhe këtë javë, por edhe sot e konfirmoi se vetëm shqiptarët kjo Qeveri nuk i përfshinë dot në fokusin e saj. Kur Ministrja e Infrastrukturës dhe Energjisë, Belinda Balluku, qytetit të gjuhës shqipe, Manastirit, i tha Bitola, vetëm gazetarët u habitën dhe jo Kryeministri që kishte në krah; Por kur vetë Edi Rama më pas duke folur për Kosovën e cilësoi shtet fqinj, atëherë u qartësua dhe fokusi i kësaj qeveri që po shkatërron kombin shqiptar. Dhe jo vetëm kaq!

Deri më sot heshti dhe nuk iu përgjigj Presidentes së Kosovës, Vjosa Osmanit, pas fjalimit në Parlamentin e Shqipërisë, sot foli por meqë nuk pyet këshilltar, rezultoi se sa i mirë është Edi Rama kur hesht! Duke ju përgjigjur Vjosa Osmanit, sot tha nuk ka asnjë problem me Kosovën, por për fat të keq, Kosova ka probleme me veten! Ndërsa kërkesë për heqjen e traut që kërkoi Presidentja sepse Kosova nuk kanë nevojë për një tra të vendosur nga Shqipëria, Kryeministri Rama e quajti groteske dhe jo dashamirëse. Nëse për Znj.Vjosa atdheu është Kosova dhe Shqipëria, tha Edi Rama, atëherë ky është një tra mes atdheut, që duhet ta paguajnë të gjithë atdhetarët.

“Sa i përket vizitës së Vjosa Osmanit, unë them që sigurisht objektivi ynë ka qenë dhe mbetet zero probleme me fqinjët, por zero probleme me fqinjët nuk do të thotë fshehje e problemeve, do të thotë zerim i tyre. Përtej kësaj, në këtë rast nuk është se ne kemi probleme, nuk kemi asnjë problem me Kosovën. Për fat të keq, Kosova ka probleme me veten dhe nëse mund të bëj një përkufizim të përmbledhur të problemit që unë shoh atje, është se prej sa kohësh politika e brendshme është bërë politikë e jashtme dhe e kundërta. Kjo e ka rraskapitur Kosovën së brendshmi dhe së jashtmi. Ky është një problem që unë e shoh me shumë shqetësim. E kam adresuar në të gjitha bisedat e mia me udhëheqësit në Kosovë dhe jam përpjekur edhe publikisht, sigurisht pa dashur të rëndoj askënd dhe për asgjë. Është tipike ajo që ndodh me qasjen ndaj shengenit rajonal, ku një nga shtyllat e politikës së jashtme, që ka të bëjë me politikën rajonale, është bërë si kalaja e Rozafës në Kosovë, disa e ngrenë ditën, disa e shembin natën,” tha Edi Rama për ta akuzuar Vjosa Osmanin, aty ku dhimbja ishte më e madhe meqë shtrihet nga selia e Partisë Socialiste deri në Presidencën e Serbisë, Mini Shengeni:

“Për mua është e pakonceptueshme që një qeveri legjitime të firmosë vullnetin e shtetit të Kosovës në Shtëpinë e Bardhë dhe një presidente në detyrë të shfaqet në Shqipëri dhe të bëjë politikë të brendshme me këtë shtyllë të politikës së jashtme të Shqipërisë dhe Kosovës”, tha kryeministri Rama, ndërsa shtoi me tone të ashpra se “Kjo nuk ka lidhje me marrëdhënie mes shteteve, por është konceptuale dhe në funksion të nevojës për të kaluar në një funksion tjetër të luftës diplomatike me Serbinë. Nuk fitohet lufta me Serbinë në këtë mënyrë, duke rrotulluar thikën e nacional-folklorike vulgar. Lufta diplomatike bëhet me mjete krejt tjera. Facebook-u, Instagrami, deklaratat, nuk zëvendësojnë pushkët dhe nuk përdoren as si topa, as si bomba e granata, sepse thjesht plagosin vetveten, jo kundërshtarin. Me atë formë ne kurrë nuk do e kishim hapur linjën e energjisë të interkonjeksionit Shqipëri-Kosovë”.

Pasi u sqarua se për Kryeministrin Edi Rama, Kosova është shtet fqinj, iu përgjigj edhe Presidentes së Kosovës, Vjosa Osmani, atdheu është Kosova dhe Shqipëria, atëherë ky është një tra mes atdheut, që duhet ta paguajnë të gjithë atdhetarët.

“Akoma më grotesk është debati për traun. Paraqitet trau i pagesës së rrugës si kufi i vendosur për Kosovën. Kjo është të bësh politikë të brendshme me një çështje administrative të vendit fqinj dhe të vish në Tiranë të bësh propagandë për të fituar vota në Kosovë me një demagogji dhe retorikë absurde, sepse ai tra atje nuk është kufi. Sikundër trau me pagesë që do të vihet nesër në rrugën e re Milot-Fier, që nuk është kufi mes qyteteve. Kjo është groteske, por edhe jo dashamirëse. Nëse për z. Vjosa atdheu është Kosova dhe Shqipëria, atëherë ky është një tra mes atdheut, që duhet ta paguajnë të gjithë atdhetarët. Vlen kjo për të gjithë ata që e përdorin rrugën. Faktet sot flasin qartë, shikojeni rrugën. Besoj se dhe z. Vjosa dhe gjithë të tjerët nëse duan të shohin, e shohin ndryshimin kapilar në atë rrugë, që ishte e rrezikshme dhe sot po bëhet me të gjitha standardet,” tha Kryeministri Edi Rama duke përfunduar:

“Pra, këto janë dy pika që flasin qartësisht për një sëmundje që e ka prekur dhe po e gërryen politikën në Kosovë, duke bërë një alterim të funksioneve politikë e brendshme me politikën e jashtme dhe e kundërta.”

Ndryshe, në fokus të konferencës së sotme të Kryeministrit Edi Rama ishte energjia, duke u krenuar për punën që kishte bërë pas 7 vjet e 2 muaj, tha se pas vënies në funksion të linjës së interkonjeksionit Shqipëri-Kosovë, është hapur kantieri edhe për linjën tjetër që e lidh me Maqedoninë e Veriut. Tregu tashmë i përbashkët Shqipëri-Kosovë, tha Rama synon të zgjerohet dhe bashkohet me atë të Italisë e Malit të Zi.