Toka kroate nuk po qetësohet, 3 tërmete të fuqishme mëngjesin e sotëm…

Pasgoditje të shumëta vazhduan pas tërmetit të djeshëm shkatërrimtar por mëngjesi i sotëm sërish ishte i frikshëm për banorët e Petrinjes, Sisakut dhe Zagrebit ku u regjistruan 3 tërmete të fuqishme. Goditja e parë u regjistrua në orën 6:16 me magnitudë 4.7 të shkallës Rihter për të pasuar me një me magnitudë 4.8. Tërmeti i radhës ishte me magnitudë 3.9 të shkallës Rihter por pak rëndësi kishte kjo kur të gjithë qytetarët ishin në rrugë.

“Pasgoditjet nga ora 6:15 e datës 30.12.2020 ishin 6:15 (M 4.7), 6:26 (M 4.8) i 6:29 (M3.9),” bëri të ditur Shërbimi Sizmologjik i Kroacisë përmes rrjetit social Twitter.

Drejtorja e këtij Shërbimi, Ines Ivançiç, tha se epiqendra ishte në Petrinje ndërsa qartësoi se do të vazhdojntë pasgoditjet:

“Lëkundjet do të vazhdojnë për një kohë të gjatë, tërmeti i së martës ishte shkatërrimtar dhe pas tij do të pasojnë shumë tërmete tjera ku me siguri do të ketë edhe të fuqishme,” tha sizmologia Ines Ivançiç.

Ndryshe, në tërmetin e fuqishëm me magnitudë 6.4 të shkallës Rihter i cili goditi dje në orën 12:19 Kroacinë, humbën jetën 7 persona në mesin e të cilëve edhe një vajzë 12 vjeçare.