Vjosa Osmani: FSK po shndërrohet në ushtri moderne!
Ushtruesja e detyrës së presidentit të Kosovës, Vjosa Osmani, në fjalimin e fundvitit para ushtarëve të Forcës së Sigurisë së Kosovës tha se FSK po shndërrohet në ushtri moderne falë bashkëpunimit me SHBA.
“Ushtria e Kosovës po shndërrohet në ushtri moderne falë bashkëpunimit me aleatët perëndimorë veçmas me Shtetet e Bashkuara të Amerikës”, tha Vjosa Osmani para ushtarëve në kazermën “Adem Jashari” duke shtuar:
“Ka ardhur koha që ushtarakët tanë të japin kontributin e tyre në misione paqeruajtëse ndërkombëtare, sepse përmes përvojës së tillë ju do të shquheni për profesionalizmin, besueshmërinë, kontributin për paqe e siguri në botë dhe po ashtu lojalitetin ndaj vlerave më të larta demokratike. Sot mund të kemi një ushtri të vogël në numra, por ka një zemër e trimëri të madhe, e gatshme e profesionale t’i shërbejë atdheut e mbrojtjes së interesave shtetërore brenda dhe jashtë vendit. Të nderuar ushtarakë, sot ne kujtojmë me krenari rolin e UÇK-së dhe në veçanti të komandantit Adem Jashari, familjes Jashari në luftën për çlirimin e atdheut,” tha Presidentja e Kosovës duke shpreh mirënjohje të veçantë për të gjithë ushtarët tanë e veçanërisht për dëshmorët që dhanë jetën për lirinë që e gëzojmë sot.
Përkundër sfidave për shkak të pandemisë, tha ajo, ky vit ishte i suksesshëm në ngritjen e kapaciteteve të FSK-së, e cila ka dëshmuar gatishmërinë e saj për t’i shërbyer vendit dhe paqes me profesionalizëm.
“Ju ishit gjithnjë të gatshëm t’i dilni në ndihmë qytetarëve dhe institucioneve të vendit, duke mos kursyer asgjë nga vetja”, tha Osmani.
Ndryshe, Parlamenti i Kosovës në vitin 2018 miratoi ndryshimet ligjore për transformimin e mandatit të Forcës së Sigurisë së Kosovës në forca të armatosura. Ky proces është parashikuar të zgjasë 10 vjet.
