Dita e 22-të në Shkodrën e përmbytur, Ademi: Nevojitet evakuuimi i banorëve dhe i gjësë së gjallë!
Në ditën e 22-të situata në zonat e përmbytura në Bashkinë Shkodër vazhdon të rëndohet dhe nëse niveli i ujit vazhdon të rritet nevojitet evakuuim i banorëve dhe i gjësë së gjallë.
Alarmin e ngre sot Kryetarja e Bashkisë Shkodër, Voltana Ademi, pas një skanimi që i bënë zonave të përmbytura:
“Në Anën e Malit situata vijon të mbetet e rënduar. Fshati Obot vazhdon të jetë i rrethuar nga uji. E njëjta situatë, është edhe në Muriqan e Goricë. Nën ujë janë 1200 hektarë dhe dëmet në kulturat bujqësore janë shumë të mëdha. Problem vazhdon të mbetet baza ushqimore për gjënë e gjallë,” thekson Voltana Ademi në reagimin e saj përmes rrjetit social Facebook duke bërë të ditur se për 22 ditë, janë sjellë 23 ton misër ndërsa nevojat për 10 ditë janë 50 ton.
“Aktualisht, me sipërfaqen e përmbytur, jemi në nivelin e përmbytjeve të vitit 2018. Nëse niveli i ujit vazhdon të rritet, rrezikohet përmbytja e banesave dhe nevojitet evakuuim i banorëve dhe i gjësë së gjallë.”
Në fund, Kryetarja e Bashkisë Shkodër, Voltana Ademi, thekson se emergjente është sigurimi i bazës ushqimore për gjënë e gjallë pasi rrezikohet seriozisht mbijetesa e saj nëse nuk do të ketë furnizim me urgjencë nga instancat shtetërore si Ministria e Bujqësisë.
