Rama-deputetëve të PS: Mos ushtroni presion për punësimet, shkoni në zonat tuaja…

Kryeministri Edi Rama, njëherëz Kryetar i PS-së, është treguar i prerë dhe i ashpër me deputetët socialist, gjatë një mbledhjeje të grupit parlamentar të kësaj partie.

Sikundër raportohet, Rama ka kërkuar nga deputetët që të mos ushtrojnë presione mbi drejtuesit e institucioneve në lidhje me punësimet dhe të harxhojnë më shumë kohë në zonat e tyre elektorale.

“Hiqni dorë nga sms që dërgoni për të punësuar njerëz, shkoni takoni qytetarët, pyetini për hallet dhe problemet, mos ndërhyni pranë drejtuesve të institucioneve vetëm për punësime të njerëzve tuaj”, mësohet t’u ketë thënë Rama ligjvënësve socialist.

Burimet shprehen se Rama ka qenë i prerë për faktin se në pothaujse të gjitha takimet që ka pasur në bashki apo qarqe të ndryshme të vendit, i është shprehur shqetësimi mbi ndërhyrjet e deputetëve socialistë për të punësuar njerëzit e tyre në administratë.

“Zgjedhjet në administratë duhet të behën përmes konkurseve. Lërini konkurset të funksionojnë, shpërndahuni nëpër zona. Bëni kujdes me qytetarët”, mësohet të jetë shprehur Rama, sipas burimeve.