Komisioni Rregullator i KQZ, miratohet fleta e votimit për zgjedhjet e 25 Prillit

Komisioni Rregullator pranë Komisionit Qendror të Zgjedhjeve, KQZ, ka miratuar sot fletën e votimit të propozuar nga Komisioneri Shtetëror i Zgjedhjeve.

KQZ bënë të ditur se Komisioni Rregullator pasi shqyrtoi projektvendimin “Për miratimin e specifikimeve teknike të fletës së votimit për zgjedhjet për Kuvendin e Shqipërisë të datës 25 prill 2021” miratoi specifikimet teknike sipas të cilave:

“Fletët e votimit duhet të jenë prej letre, me ngjyrë, trashësi ose elemente konfigurimi të tilla që të mos lejojnë leximin e votës në pjesën e pasme të saj, si dhe të përmbajnë elemente sigurie, sipas përcaktimeve me akt normativ të KQZ-së.”

Dhe jo vetëm kaq!

“Fleta e votimit përmban element teknik në formën e kodeve që identifikojnë zonën zgjedhore, qendrën e votimit, si dhe elemente të tjera identifikuese që nuk lexohen me sy të lire (barkod). Ato do të prodhohen në blloqe pa kundërfletë. Numri i serisë së bllokut të fletëve të votimit shënohet në dokumentin që shoqëron bllokun e ambalazhuar, sipas përcaktimeve të KQZ-së,” thuhet në njoftimin e Komisionit Qendror të Zgjedhjeve pas mbledhjes së Komisionit Rregullator.

Ndryshe, anëtarja e Komisionit Rregullator, Helga Vukaj, kërkoi që kandidatët e partive në fletën e votimit për zgjedhjet e 25 prillit të identifikohen me emra dhe jo me numra.