Dita e parë e punës si Kryetar i LDK, Abdixhiku: Prej sot përgatitemi për rikthimin e madh!

Kryetari i ri i Lidhjes Demokratike të Kosovës, Lumir Abdixhiku, ditën e parë të punës e nisi me homazhe te varri i Ish-Presidentit, Ibrahim Rugova për të vazhduar me mbledhjen e Kryesisë.

“Mburremi me të shkuarën, ideojmë të ardhmen. Sot, ditën e parë e nisa në nderim të Presidentit Ibrahim Rugova, themeluesit të LDK-së e themelëtarit të Republikës sonë. E shkuara na nderon e motivon. Është standard i lartë për secilin prej nesh. Por e shkuara s’na mjafton sot. Sot përgatitemi për sfidat e kohës. Për stabilitet politik e konstruktivitet institucional; për dëgjim të vullnetit qytetar; për opozitë të drejtë, origjinale e të guximshme,” thekson Lumir Abdixhiku në reagimin e tij përmes rrjetit social Facebook duke përfunduar:

Nga sot, përgatitemi për rikthimin e madh!

Pas nderimit që i bëri Dr.Rugovës dhe të kaluarës sot Kryetari i ri i LDK-së vazhdoi me mbledhjen e Kryesisë kur dhe u sqarua se pas takimit të së premtes me U.D. Presidenten Vjosa Osmani dhe Kryetarin e Lëvizjes Vetëvendosje, Albin Kurti, do të përcaktohet veprimi i Lidhjes Demokratike të Kosovës në zgjedhjen e Presidentit

Ndryshe, Lumir Abdixhiku u zgjodh kryetar i LDK pas debaklit që pësoi kjo parti në zgjedhjet e 14 shkurtit, ku doli partia e tretë me vetëm 12.76 për qind të votave.