AAC: KFOR-i nuk lejon hapjen e korridorit ajror Kosovë-Shqipëri

Republika e Kosovës ende nuk po arrin ta normalizojë hapësirën e ulët për hapjen e korridoreve të reja ajrore me Shqipërinë, Malin e Zi dhe Serbinë.

Hapja e korridoreve të reja ajrore nënkupton shkurtimin e kohës së fluturimeve dhe në uljen e çmimit të biletave për qytetarët. Mirëpo për të arritur normalizimin e hapësirës së ulët ajrore dhe kontrollin e hapësirës së lartë ajrore, drejtues të Autoritetit të Aviacionit Civil, thonë se nevojitet një vullnet politik me faktorin ndërkombëtar, respektivisht me NATO-n dhe KFOR-in.

Drejtori i përgjithshëm në Autoritetin e Aviacionit Civil, AAC, Eset Berisha në një intervistë për KosovaPress, thotë se Kosova dhe Shqipëria kanë identifikuar korridoret e reja ajrore dhe kanë bërë të gjitha përgatitjet teknike, ndërsa me Malin e Zi dhe Serbinë nuk ka gatishmëri nga këto dy shtete.  

Kreu i AAC-së thotë se si rezultat i gjithë kësaj problematike, siguria kombëtare e Kosovës nuk është në nivelin e duhur deri në normalizimin e hapësirës së ulët ajrore dhe marrjen e kontrollit të hapësirës së lartë ajrore nga autoritetet e Kosovës.

Sipas tij, kompania nga Hungaria “Hungarokontrolli, të cilës i ka skaduar kontrata pesë vjeçare në këtë muaj, vetëm në vitin e kaluar ka arritur të inkasoj 7 milionë nga 160 mijë mbikalime që kanë ndodhur mbi hapësirën ajrore të Kosovës. 

Hapësira e lartë ajrore në Kosovë ishte hapur për herë të parë pas luftës në vitin 2014, dhe që nga ajo kohë kontrollin e hapësirës së lartë ajrore në Kosovë është duke e bërë kompania hungareze “Hungarokontrolli”