Aeroporti i Vlorës, Karakaçi: Masat mund të përshkallëzojnë deri në zgjidhje të kontratës

Qeveria shqiptare paralajmëroi ndërhyrje ligjore për të garantuar hapjen në afat të Aeroportit Ndërkombëtar të Vlorës, ndërsa konflikti mes aksionerëve privatë dhe përplasjet gjyqësore kanë sjellë vonesa që po godasin sektorin turistik dhe po rrisin shqetësimet për klimën e investimeve në vend.

Ministri i Infrastrukturës dhe Energjisë, Enea Karakaci, e cilësoi projektin si “një prej projekteve më të rëndësishme në 10 vitet e fundit”, duke theksuar se mosfunksionimi i aeroportit “nuk është thjesht çështje biznesi privat, por çështje interesi publik dhe shtetëror”.

“Çdo ditë vonesë apo bllokim përkthehet në humbje ekonomike të matshme për operatorët turistikë, komunitetin lokal dhe buxhetin e shtetit,” tha Karakaci në një deklaratë publike, duke shtuar se situata po dërgon “mesazhe negative tek investitorët e huaj”.

Deklaratat vijnë në një moment kur tensionet mes palëve private të përfshira në projekt kanë hyrë në një fazë të re përshkallëzimi, duke çuar në bllokim të kantierit dhe akuza reciproke ligjore. Ministria e Infrastrukturës dhe Energjisë tha se nuk është palë në konflikt, por paralajmëroi se shteti nuk do të lejojë që një mosmarrëveshje civile të pengojë funksionalizimin e një infrastrukture strategjike.

“Asnjë nuk ka të drejtë të mbajë peng një infrastrukturë me rëndësi kombëtare,” tha Karakaci. Sipas tij, qeveria është “e gatshme të përdorë instrumentet e mëvonshme ligjore, përfshirë aktivizimin e çdo klauzole në kontratë”, për të garantuar që aeroporti të hapet sipas afateve të parashikuara.

Ministri bëri të ditur se procesi mund të vijojë deri te kërkesa për një plan mitigues për rregullimin e pasojave të kontratës, i cili mund të rezultojë në shtyrje të afatit të kontratës ose në zgjidhje të njëanshme të saj, nëse palët nuk arrijnë të rikthejnë normalitetin në projekt.

Ministri tha se MIE ka monitoruar të gjitha fazat e ndërtimit dhe ka siguruar përputhshmërinë me detyrimet kontraktore dhe kushtet e koncesionit, por shprehu shqetësim për dëmin reputacional që konfliktet mes zhvilluesve po i shkaktojnë projektit.

Më herët Monitor raportoi se vonesat në hapjen e Aeroportit të Vlorës kanë krijuar pasiguri në industrinë turistike, me disa operatorë që kanë anuluar ose pezulluar kontratat për sezonin veror, duke argumentuar se planet e tyre të fluturimeve dhe paketave turistike ishin ndërtuar mbi pritshmërinë që aeroporti të hynte në operim këtë vit.

Operatorët kishin parashikuar që aeroporti i ri të rriste ndjeshëm aksesin në Jug të Shqipërisë veçanërisht për charter-at europianë dhe tregun e turizmit elitar./Monitor/