Agron Shehaj, i vetmi që plotëson kushtet për të drejtuar PD-në aktuale!
Pas vendimit të Kryesisë së Partisë Demokratike për të miratuar 4 kandidaturat për zgjedhjet e 13 qershorit për Kryetar të PD, sot Lulzim Basha, Fatbardh Kadilli, Edith Harxhi dhe Agron Shehaj fillojnë fushatën e tyre për të shpalosur platformat e drejtimit të partisë!
Meqë zgjedhja e Kryetarit të Partisë Demokratike po organizohet pa një analizë të humbjes së zgjedhjeve të 25 Prillit, dhe përkundër lançimit ndër demokratë të projektit nga Inteligjenca e PD-së me këshilla izraelite, për kryetar Lulzim Bashën dhe Nënkryetar Agron Shehajn, realiteti në këtë parti jep vetëm një rezultat të mundshëm më 13 Qershor.
Bazuar në strukturat ekzistuese të Partisë Demokratike, Kryetar i ardhshëm i PD më 13 Qershor sërish do të zgjidhet Lulzim Basha. Por, në mungesë të një analize të zgjedhjeve të 25 Prillit, Lulzim Basha rrezikon këtë post në mungesë të tre elementëve kyç që favorizojnë Agron Shehajn.
1.Quhet Agron Shehaj; 2. Nuk ka lidhje me Partinë Demokratike; dhe, 3.Gjithçka që ka bërë në jetën e tij politike dhe jo vetëm, e ka bërë me para!
Duke qenë Agron Shehaj, sforcoi mediat që të gënjejnë se në zgjedhjet e 25 Prillit 2021 ai ishte më i suksesshmi në PD, që është dhe një mashtrim ordiner pa kurrfarë baze. Madje është e kundërta!
Po është e vërtetë se Agron Shehaj arriti ti shtoj 4.241 vota Partisë Demokratike në Njësinë Administrative Nr.5 ku fitoi në Tiranë por me largimin e tij nga Vlora rezulton se Partia Demokratike pësoi rritje të dukshme dhe PS u fundos.
Në vitin 2017, Agron Shehajn nuk e njihte njeri, konsiderohej si njeri i Kunatit, më vonë u konvertua në njeriun e Lulit por shumë shpejtë, kur Edi Rama kandidoi në Vlorë u vërtetua se misioni i tij s’kishte të bënte as me Kunatin, as me Lulin e aq më pak me Partinë Demokratike.
Shansi historik që i dha Kryeministri Edi Rama me kandidimin në Vlorë, vendlindjen e Agron Shehajt, ky jo vetëm që nuk e shfrytëzoi por i iku kësaj përballje duke pasur gjithë pakënaqësinë vlonjate në dispozicion, si me Lungomaren ashtu dhe shkatërrimin e turizmit dhe qindra bizneseve tashmë të identifikuara.
Ndër demokratë sërish në vitin 2021 filluan përrallat me Kunatin dhe Lulin pse ai u zhvendos në Tiranë, por shifrat tregojnë se, gjithsesi, ai mund të jetë biznesmen i sukssesshëm por është njëri ndër deputetët më të dështuar në Partinë Demokratike.
Në vitin 2017, PD kishte 23.207 vota ose 21.31 për qind, PS 65.684 vota ose 60.31 për qind dhe LSI 12.246 vota ose 11.24 për qind. Me largimin e Agron Shehajt nga Vlora, në vitin 2021, PD kishte 32.128 vota ose 31.52 për qind, PS 59.024 vota ose 57.91 për qind dhe LSI 6.202 vota ose 6.08 për qind; Përkatësisht, PD ka tashmë 8.921 vota më shumë ndërsa PS u tkurr me 6.660 vota, që në total dobi a e largimit të Agron Shehajt për kandidim në vendlindje, Vlorë, për Partinë Demokratike shkon 15.581 vota, dobi e cila zhvlerëson edhe suksesin e tij të trumbetuar në Tiranë.
Dhe, deri sa demokratët në Vlorë festuan moskandimin e Agron Shehaj, situatë më e mirë nuk ishte as në Njësinë Administrative Nr.5 në Tiranë ku ai kandidoi, pavarësisht populizmit që u mundua ta shes me fletëpalosje në rrugët e kryeqytetit. Pas daljes te Fevziu, nuk ishte më mister, u pa se bëhej fjalë për një biznesmen si çdo biznesmen në një shtet të varfër, i cili luan rolin e të pasurit me paratë e tjetrit.
Erdhi dhe 25 Prilli 2021 për të dëshmuar se aty ku PD mori 8.565 vota ose 23.19 për qind në vitin 2017, në vitin 2021 Agron Shehaj me performancën e tij mori 13.225 vota ose 33.98 për qind ndërsa PS pikërisht për shkak të kësaj performance të rritë numrin e votave duke marrë 20.230 vota ose 51.98 për qind kundrejt 19.811 votave ose 53.64 për qind që kishte marrë në vitin 2017.
Mburrja me suksesin e madh të Partisë Demokratike me Agron Shehajn në Njësinë Administrative Nr.5 në Tiranë është një tullumbace që shfryhet me 4.660 vota, sikur t’ja shtojmë edhe faktin e rritjes së votave të PS me 419 vota, që në total kemi 4.241 vota të Tiranës më shumë që turpërojnë Agronin dhe arsyetojnë vendlindjen e tij se pse nuk e duan këtë njeri, kur mund ti marrin 15.581 vota më shumë vetëm pse ai nuk kandidon në Vlorë!
Ndërsa mburrja e Agron Shehajt si i dyti më i votuari në Partinë Demokratike me 13.862 vota nuk është objekt analize e PD por e biznesit që zotëron në Tiranë!
Shifrat, që janë më kokëforta se tullumbacet e Agron Shehajt në mediat që paguan, dëshmojnë dhe elementin shumë të rëndësishëm që nuk e ka Lulzim Basha dhe rrezikojnë PD-në, si dhe kombin shqiptarë të mbetet pa një të djathtë: Quhet Agron Shehaj!
Nuk ka lidhje me PD
Elementi i dytë që favorizon Agron Shehajn në garën për Kryetar të PD është se nuk ka lidhje me PD, e metë e madhe që e kishte Sokol Olldashi në vitin 2013. Sali Berisha dha dorëheqje dhe mori të gjitha mëkatet ndërsa PD nuk bëri një analizë mbi humbjen e thellë pavarësisht konsumimit që kishte pas një qeverisje 8 vjeçare.
Lulzim Basha si i huaj arriti të korr një fitore bindëse përballë Kolit tashmë të ndjerë, duke u konsideruar si një prurje e re që do të sjellë ndryshimin, që për Kolin e shtëpisë ishte e vështirë të bindet shumica!
Edhe sot, sikur të bëhej një analizë e humbjes së 25 Prillit, ku do të vihej gishti në plagë, i huaji Agron Shehaj mund të vazhdonte ta luante rolin vetëm në biznes por jo dhe në politikë; Do të zbulohej me një mashtrimi ordiner ndër shalë!
Por, në mungesë të kësaj analize, Agron Shehaj vjen si person apolitik bëhet dhe Kryetar, dhe të vetmin ndryshim që mund të sjellë në Partinë Demokratike është goditja e përqëndruar ndaj PD Dega Vlorë dhe ndryshimi i Administratës në selinë qendrore, që mund të konsiderohet dhe normalitet për një Kryetar të ri, edhe pse ky është një njeri që s’ka lidhje me asnjë strukutrë të partisë!
Shumë gabime të Lulzim Bashës i janë adresuar Sali Berishës duke u bazuar në natyrën e liderit historik që në rastin e Agron Shehajt nuk mund të merret me mend. Sali Berisha për Agron Shehajn gjithçka mund të bëhet por lideri historik kurrë! Ky njeri që sheh ëndrra me kufje dhe call center, nuk mund ta entuziazmojë politika e Saliut, aq më pak ajo e Lulzim Bashës, të cilin kurrë nuk e ka parë as si Kryetar dhe as Kryeministër.
Mundësia që i dha PD dhe Lulzim Basha këtij njeriu për të ardhur nga rruga dhe për tu bërë deputet, dhe sot për të treguar se si bëhet demokracia, janë arsyet kryesore që ai kandidon për Kryetar të PD ndonëse nuk ka asnjë lidhje me atë post, as karizmën, as dijen dhe as dhuntinë!
Paraja, pa provë…
Agron Shehaj u bë i pasur, nuk dihet se si dhe nuk e njihte njeri, por me këto para erdhi nga emigracioni dhe u bë deputet. Po me këto para u paraqitë në media, u paraqitë si afërt i Kryetarit të PD, këtë e konfirmoi me zhvendosjen e kandidimit në Tiranë dhe së fundit vendosi kandidaturën për Kryetar të PD!
Pra, gjithçka që ka bërë në jetën e tij politike dhe jo vetëm, e ka bërë me lekë!
Dhe, pas zgjedhjeve të 25 prillit, në garën për Kryetar të PD lehtësisht mund ta blejë votën duke dhënë paranë pa provë. Këtë ia ka mundësuar Tom Doshi!
Kur njeriu i blenë votën atij që betohet në Kishën e Laçit, imagjinoni se çfarë bëjnë me votën gjytyrymave të tjerë, aq më shumë votën e partisë. Madje, në zgjedhjet e 13 Qershorit, edhe anëtarësia e PD mund të pësoi rritje duke pasur parasysh kandidimin e Agron Shehajt me para!
Edhe këtu Lulzim Basha është i hendikepuar sikur të ketë dhe aq lekë sa thotë makineria propagandistike e Edi Ramës! Si do ti jap?!
Në fund, të mos përfillim dhe një armatë të tërë votash që bazuar nga bashkëpunëtorët e tij të ngushtë që ka pasur dhe ka filluar ti afroj, mund ti vijnë nga LGBTI!
Për të gjitha sa u tha më sipër, dhe bazuar në situatën aktuale në të cilën ndodhet Partia Demokratike, i vetmi që plotëson kushtet për të drejtuar PD-në është Agron Shehaj! A do të fitoj një reformator, kjo nuk varet nga Agron Shehaj. Qëllimi i ardhjes së Agron Shehajt në Partinë Demokratike nuk ishte, Reforma!
