Akademi përkujtimore/ Terrori i një Kryeqyteti! Çelo Hoxha: Libri i Kadaresë për këtë ngjarje vepër terroriste…

Shoqata Antikomuniste e të Përndjekurve Politikë të Shqipërisë dhe Instituti i Studimit të Krimeve dhe Pasojave të Komunizmit në Shqipëri bënë sot homazhe tek memoriali kushtuar 37 viktimave të terrorit komunist në Tiranë, 30 tetor -16 nëntor 1944, si dhe organizuan një Akademi përkujtimore në Akademinë e Shkencave në Tiranë kushtuar kësaj ndarje.

Në Akademinë Përkujtimore me temën “Terrori i një Kryeqyteti “ studiues të ndryshëm folën për masakrën, martirët dhe autorët e saj.

Referuesit në këtë Akademi, Nebil Çika, Agron Tufa, Orhan Sakiqi, Çelo Hoxha, Uran Kostreci dhe Xhafer Sadiku, hodhën dritë mbi këtë terror dhe intelektualët e pushkatuar pa gjyq, që të gjithë patriotë dhe personalitete të njohura të jetës në Shqipërinë e asaj kohe.

Studiuesi i historisë Dr.Çelo Hoxha hodhi dritë mbi përpjekjet që propaganda komuniste gjatë diktaturës bëri për të mbuluar e tjetërsuar këtë krim lufte të komunistëve shqiptar. Çelo Hoxha u përqëndrua tek libri i Ismail Kadaresë “Nëntori i një kryeqyteti“ dhe filmin me të njëjtin subjekt e skenarist “Radiostacioni” që kishin si temë pikërisht këtë terror dhe e cilësoi atë si një vepër po aq terroriste sa edhe vetë masakra terroriste.

Studiuesi Xhafer Sadiku solli prova historike e arkivore që vërtetonin qëndrimin kundër pushtuesve fashist të një pjese te mirë të martirëve që komunistët pushkatuan pa gjyq në këtë terror komunist.