Aksion i madh i Europol, arrestohen 25 anëtarë të mafias shqiptare

Gjatë aksionit të madh të drejtuar nga Europol, i cili njëkohësisht është kryer në Belgjikë, Spanjë, Holandë, Gjermani dhe Francë, ku morën pjesë 600 policë, janë arrestuar 25 pjesëtarë të dyshuar të grupit shqiptar i cili merret me trafikun e drogës.

Hetimi i cili është kryer nga policia lokale e Antwerpen ka zbuluar se droga është trafikuar duke u fshehur në kontejner në Belgjikë, para se të shpërndahej nëpër Evropë, duke përdorur makina në të cilat janë ndërtuar hapësira të sofistikuara për transportin e drogës, thuhet në komunikatën e Europol.

Besohet se ky grup kriminal ka administruar disa plantacione me kanabis në Spanjë dhe Gjermani, ku kanë kultivuar marjiuanë, para se ta transportonin në shtetet tjera evropiane për ta shitur.

Operacioni ka rezultuar me arrestimin e 9 të dyshuarëve në Belgjikë, 6 në Spanjë, 3 në Holandë, 6 në Gjermani dhe 1 në Francë, me numrin total prej 25 të arrestuarve.

Janë kontrolluar 30 shtëpi, janë shkatërruar 6 plantacione të marijuanës, janë konfiskuar 60.000 euro, celularë, pistoleta dhe municion.

Europol ka mbështetur këtë hetim duke ofruar ekspertizën e duhur, mbështetjen analitike dhe lehtësime në shkëmbimin e informacioneve përmes kanaleve të tyre të sigurisë.