Akuzat ndaj Xhafajt/ Ministrit italian: 12 shqiptarë kanë kryer krime në Itali, por …

Partia Demokratike ripublikoi sot një intervistë të ministrit të Drejtësisë së Italisë, i cili gjatë një vizite në Tiranë në dhjetor 2017 tha në Report Tv se 12 shtetas shqiptarë kanë kryer krime në Itali por Tirana zyrtare nuk lejon ekstradimin.

Sipas dy zyrtarëve të selisë blu, Enkelejd Alibeaj dhe Gazmend Bardhi, në rastin e vëllait të ministrit Fatmir Xhafaj, Italia nuk mund të garantojë rihapjen e çështjes së dënimit të tij pasi, ai është përfaqësuar me avokat në të gjitha shkallët e gjyqësorit.

GAZMEND BARDHI:

Konventa Europiane për Ekstradimin, që ka qenë në fuqi dhe është zbatuar, edhe përpara se të bëhej ndryshimi i Kodit të Procedurës Penale, thotë krejt të kundërtën e asaj që deklaruan kamikazët e mazhorancës.

Konventa Europiane e Ekstradimit thotë shprehimisht se:

Ekstradimi mund të refuzohet, vetëm në ato raste kur Shqipëria mendon se procedurat e gjykimit në një çështje konkrete nuk përmbushin të drejtat minimale të mbrojtjes, të njohura për një person të akuzuar për një vepër penale. Në këtë rast, kërkohet garancia për rigjykim.

Nëse personit të dënuar në mungesë, i janë respektuar të drejtat minimale të mbrojtjes, por ai vetë ka zgjedhur që t’i fshihet drejtësisë, atëherë jo vetëm nuk kërkohet garanci për rigjykim, por sipas Konventës është e detyrueshme që të lejohet ekstradimi.

Kjo është Konventa. Ky është standardi europian.

Ndërkohë që ndryshimi i trafikuar në mënyrë korruptive nga Fatmir Xhafaj për për llogari të vëllait të tij, përcakton se edhe kur janë respektuar të drejtat minimale të mbrojtjes, edhe kur personi i fshihet me qëllim drejtësisë, përsëri ai nuk ekstradohet, nëse nuk jepet garanci për rigjykim.

Asnjë vend i Bashkimit Europian apo SHBA, nuk jep garanci për rigjykim në raste të tilla. Kjo nënkupton që personi i dënuar as nuk ekstradohet dhe as nuk e vuan dënimin në burgjet shqiptare.

Rasti i vëllait të Ministrit të Brendshëm, hyn në rastet kur Konventa lejon ekstradimin pa kërkuar garanci për rigjykim. Kjo për faktin se atij i janë respektuar të drejtat e mbrojtjes të cilat Agron Xhafaj i ka ndjekur deri në fund përmes avokatëve të tij.

Dokumentet zyrtare të drejtësisë Italiane vërtetojnë se:

Agron Xhafaj është është vënë në dijeni personalisht për ndjekjen penale.
Agron Xhafaj ka pajtuar avokat mbrojtës
Ai dhe avokatët e tij kanë ankimuar vendimin në Gjykatën e Apelit të Leces dhe më pas në Gjykatën e Lartë Italiane.
Këto ankime dhe provat dhe argumentet e paraqitura nga avokatët mbrojtës janë rrëzuar përfundimisht nga të dyja këto Gjykata.
Vendimi është përfundimtar dhe i formës së prerë dhe e drejta e mbrojtjes të dënuarit Xhafaj është garantuar plotësisht.
Por Agron Xhafaj, ka zgjedhur t’i fshihet drejtësisë dhe të strehohet në Shqipëri.

Në këto kushte, asnjë autoritet italian nuk jep garanci për rishikim të vendimit, në shkelje te legjislacionit italian dhe Konventës Europiane për Ekstradimet.

Tani si pasojë e amendamentit korruptiv Xhafaj në Kodin e Procedurës Penale, është pamundësuar ekzekutimi i dënimit në Itali ose në Shqipëri.

Pra i dënuari me 7 vjet e 2 muaj burg për trafik droge nuk vuan asnjë ditë!

Fakti që neni i kontrabanduar nga Fatmir Xhafaj, për llogari të vëllait të tij, nuk është standard i Konventës, nuk është qëndrim VETËM i opozitës shqiptare. Ky është qëndrim zyrtar i autoriteteve italiane.

Unë dëshiroj t’ju ftoj të dëgjoni me zë e figurë, qëndrimin e Ministrit Italian të Drejtësisë, të dhënë në një intervistë më datë 13 Dhjetor 2017, ku thekson se në bazë të Konventave vendime e dënimit të dhëna në mungesë duhet të ekzekutohen, dhe se Italia nuk ka dhënë garanci për rigjykim për 12 persona të dënuar në Itali dhe për të cilët është kërkuar ekstradimi nga momenti i hyrjes në fuqi të ligjit Xhafaj e deri në Dhjetor 2017.

Të dënuarit janë të lirë në Shqipëri? Ja si u përgjigj ministri Xhafaj

Pyetje: Ka edhe një problem të njohjes së vendimeve italiane nga pala shqiptare. Me rezulton se janë rreth 12, apo jo?

Përgjigje Ministri: Po, është një çështje që e diskutuam edhe sot me Ministren shqiptare dhe i referohet atyre rasteve kur dënimet janë edhe në mungesë. Kodi italian e lejon, ndërsa ai shqiptar jo. Dhe kjo nuk ka bërë të mundur një lexim të përbashkët mes palëve të cështjeve procedurale. Ne mendojmë se në bazë të Konventave edhe këto vendime duhet të ekzekutohen. Është një moment që duhet të sqarohet dhe synojmë ta sqarojmë.

Pyetje: Për ta kuptuar më qartë. Janë 12 shqiptar që janë të dënuar në Itali dhe ndodhen në Shqipëri, por këtu as nuk arrestohen dhe as nuk ekstradohen drejtë Italisë?

Përgjigje Ministri: Po pikërisht kështu, sepse pala shqiptare mendon se këto procese nuk janë konform ligjeve në Shqipëri dhe nuk janë ekuivalente me dënimit në Shqipëri, sic ndodh me vendimet që nuk e kanë këtë problem. Ndërsa ne mendojmë që edhe vendimet e dhëna në mungesë sipas modelit të njw procesi të rregullt ligjor duhet të ekzekutohen.

Pyetje: Bëhet fjalë për krime të rënda?

Përgjigje Ministri: Jo të gjitha por ka edhe vendime domethënëse.

Pyetje: Dhe këta 12 këtu në Shqipëri janë të lirë dhe nuk janë të ndaluar?

Përgjigje Ministri: Mendoj se po, por nuk është e thënë, sepse mund të jenë të ndaluar edhe për procese që nuk kanë lidhje me proceset në Itali.