Albin Kurti në Drenas: Hajnat në burg, plaçka e vjedhur në buxhet
Kandidati për Kryeministër i Lëvizjes Vetëvendosje, Albin Kurti, tha sot në Drenas se me qeverisjen e tij nuk do të ketë familje pa kulm mbi kokë dhe nuk do të ketë shtëpi pa dikë të punësuar.
Shpesh bëhet shaka për asfaltin në Drenicë, por prapa asfaltit, tha Kurti, fshihet mjerimi i qytetarëve e dëshmi për këtë është se Drenasi dhe Skenderaj janë komunat me më së shumti skemë sociale.
“Në fshatin e presidentit, i cili nuk jeton më aty, shpesh nuk ka as ujë të pijshëm as rrymë të qëndrueshme,” tha Albin Kurti ndërsa u zotua për shtet ligjor dhe tha se si kryeministër nuk do të zmbrapset para asnjë krimineli.
“Hajnat në burg dhe plaçka e vjedhur prej tyre të kthehet në buxhetin e shtetit. Ky është shteti i së drejtës që mundësohet nga qeverisja jonë.”
Kur ish-ushtari i UÇK-së, Rexhep Selimi mori fjalën atmosfera u ndezë në sallë ndërsa ai u tha qytetarëve të Drenasit se ka ardhur koha e Drenicës.
“20 vjet me radhë, qeveritë veç sa i morën Drenicës e nuk i dhanë asgjë, për 20 vjet veç sa i morën dhe nuk i dhanë asgjë, për 20 vjet i morën familjeve të dëshmorëve dhe nuk u dhanë asgjë. Tash, Drenica, UÇK e familjet e kanë fjalën e tyre, sepse atyre u erdhi dita. Erdhi dita, sepse po vjen qeveria e Vetëvendosjes, sepse erdhi dita sepse po vjen Albin Kurti. Çohu Drenicë e tregoje veten si dikur. Erdhi dita e Drenicës së Adem Jasharit e Fehmi Lladrovcit. Iku koha e manipuluesve me vlerat të luftës,” tha Rexhep Selimi.
