Veseli-Mustafës: PDK nuk i ka dërguar 72 çështje në prokurori

Kandidati për Kryeministër i PDK-së, Kadri Veseli, në Pejë foli për ofertën e tij, pse nuk duhet të votohet Albin Kurti ndërsa i shtriu dorën e bashkëpunimit Isa Mustafës.

“Nuk është në të mirën e Kosovës të ketë një koalicion të korrupsionit dhe izolimit. Shefit të LDK-së i them miqësisht si profesor dhe si intelektual, se edhe ai e dinë sikurse unë, sepse kemi qenë në Shtetet e Bashkuara të Amerikës, e dinë se çfarë qëndrimi ka Amerika për Kurtin dhe çfarë e ka Kurti për Amerikën. Kosova jonë është në udhëkryq, me shumë dilema dhe nuk i duhet koalicioni i izolimit dhe korrupsionit, pavarësisht ambicieve që mund t’i kenë. Nuk i kemi dërguar ne 72 lëndë të korrupsionit për Isa Mustafën në prokurori. A i duhet koalicioni i izolimit dhe korrupsionit Kosovës? A i sjellë perspektivë Kosovës koalicioni i izolimit dhe korrupsionit?”

Me këtë rast Kandidati për Kryeministër i PDK-së foli dhe për arsyen pse duhet të bëhemi bashkë të gjithë si në vitin 1999.

“Kur jemi bashkë me Amerikën, e luftojmë më fuqishëm edhe korrupsionit e nepotizmin. E zhvillojmë më shumë ekonominë, ndërmarrësinë dhe sjellim investitorë të huaj,” tha Kadri Veseli duke premtuar se qeverisja e tij do t’i japë përkrahje rinisë inovatore, fermerëve, ndërmarrësve dhe nuk do të ketë asnjë tatim të ri, por do të ulën ato që janë aktualisht, për të pasur më shumë prodhim, më shumë punësim dhe zhvillim.