Vjosa Osmani në Gjakovë: Në bisedimet e Brukselit do të flas si një nënë gjakovare

Fitorja e Lidhjes Demokratike të Kosovës, LDK, në zgjedhjet e 6 tetorit do të jetë fitore e Kosovës, tha Kandidatja për kryeministre e LDK-së, Vjosa Osmani në Gjakovë.

“Prej 7 tetorit, qytetarët e Gjakovës dhe të krejt Kosovës do ta fillojnë një epokë të re të zhvillimit dhe integrimit euro-atlantik. Për ta bërë këtë duhet ta votoni LDK-në. Që të fitojmë bindshëm dhe t’i qesim në opozitë shkaktarët e së keqes në Kosovë.”

Me këtë rast ajo u zotua:

“Plagën e Gjakovës dhe të krejt Kosovës, fatin e të pagjeturve, ne do ta adresojmë për ta zbardhur me prioritet absolut. Më besoni, si grua dhe si nënë, duke qenë në krye të qeverisë dhe duke e udhëhequr delegacionin e Kosovës në bisedimet e Brukselit, unë do të flas njësoj sikur në atë tavolinë të jenë nënat, vajzat e gratë e personave të pagjetur të Gjakovës dhe krejt Kosovës.”

Kandidatja për Kryeministre e LDK-së premtoi investime strategjike në Gjakovë:

“Përmes Ligjit për Investime Strategjike, në Gjakovë do të sjellim investitorë seriozë, që do të krijojnë vende pune e mirëqenie për familjet tuaja, që Gjakovës do t’ia kthejnë namin e dikurshëm. Rinisë së Gjakovës ne do t’ia kthejmë shpresën që perspektivën e tyre ta shohin në Gjakovë dhe në Kosovë,” tha Vjosa Osmani duke garantuar se me fitoren e saj ikja e të rinjve do të marrë fund.

Kandidatja për kryeministre e LDK-së, Vjosa Osmani në Gjakovë mori edhe përkrahjen e elektoratit të Partisë Shqiptare Demokristiane të Kosovës, si dhe të mërgimtarëve kosovarë, të cilët kishin ardhur nga Kandaja, Zvicra, Gjermania dhe nga disa vende të Evropës për ta mbështetur fitoren e Vjosa Osmanit dhe LDK-së në këto zgjedhje.