Albin Kurti: Serbia, rrezik për Kosovën dhe stabilitetin në Ballkan!
Kryeministri i Kosovës, Albin Kurti, e hapi mbledhjen e sotme të qeverisë duke folur për arrestimet e qytetarëve të Kosovës nga ana e shtetit serb, duke vlerësuar se me veprimet e saj Serbia po paraqet rrezik jo vetëm për qytetarët e Kosovës, Ballkanin por dhe vetë shtetit serb.
“Javën e kaluar dy qytetarë u ndaluan në kufi me Serbinë. Kjo nuk është hera e parë. Kjo është një sjellje e qëllimshme, dashakeqe e Serbisë që bie në kundërshtim me Konventat Ndërkombëtare për të Drejtat e Njeriut. Po ashtu Serbia po vazhdon të mbajë në paraburgim Petrit Dulaj dhe Nezir Mehaj. Ministrja e Drejtësisë, Albulena Haxhiu ka kërkuar ekstradimin e Petrit Dulaj dhe Nezir Mehmetaj. Përgjigje nuk kemi pranuar kurrë. Serbia nuk është rrezik vetëm për qytetarët tanë e stabilitetin në Ballkan, ajo së fundmi ka dëshmuar se paraqet rrezik edhe për qytetarët e saj,” tha Albin Kurti pa harruar të flas edhe për liberalizimin e vizave.
“Në këtë fillimvit i erdhi fund masës më të padrejtë që BE kishte, regjimin e vizave. Kemi qenë shteti i fundit në Ballkan që nuk kemi lëvizur lirshëm për shkak të regjimit të vizave. Fitoret, sukseset dhe arritjet e këtij muaji janë të shtetit të Kosovës nga të cilat përfitojnë qytetarët tanë. Andaj le të ecim para me vendosshemërinë e tri viteve të qeverisjes tonë dhe këtë le ta bëjmë drejt rezultateve të reja dhe arritjeve të radhës.”
Ndryshe, në mbledhjen e sotme të Qeverisë së Kosovës drejtuar nga Kryeministri Albin Kurti, u shqyrtuan disa propozim-vendime e kërkesa për ndarje buxhetore.
