Alo Podgorica, ju flet Tarrasi: Shoku Milo, falemnderit që ekziston!

Sot nuk është Eurosongu por Edisongu, dhe në prag të zgjedhjeve parlamentare në Mal të Zi, Kryeministri Edi Rama si një reporter që publikon pikët e vendit përfaqësues hapur shprehu mbështetjen për kandidatin për kryeministër, Milo Gjukanoviç.

Dhe për të bindur shokun Milo se sa primitiv që është i foli në gjuhën serbe:

“Odlucno za Crnu Goru. Hvala sto potojis dragi Milo!” /Për ata që folin gjuhën e Konicës: Me vendosmëri për Malin e Zi. Falemnderit që ekziston i dashur Milo!”

“Nuk më takon mua të gjykoj çfarë nuk ke bërë ende për Malin e Zi i takon qytetarëve të tu. Por ajo që unë mund t’i them atyre është pa dyshim, se ajo çfarë Gjukanoviç ka bërë për Malin e zi duhet t’ju bëj krenar dhe të sigurtë për fëmijët e tyre. Nuk e di se si do të ishte Mali i Zi pa Gjukanoviçin. Por ajo që ne dimë është se Mali i Zi është i pakrahasueshëm me vendin e varfër që e mori Gjukanovic. Çdo votë që shkon kundër Gjukanovicit mund të shtyjë vendin pas. Nuk ka askush sot që mund të shpëtojë të ardhmen e Malit të Zi, se sa ai që e ka shpëtuar në të shkuarën. Nuk ka kohë për eksperiment që sjellin paqartësi dhe regret. Është shumë e nevojshme të mbështesim fort Milo Gjukanovic në 30 gusht dhe të vazhdojmë punën e mrekullueshme që e ka bërë Malin e Zi, yllin në ngritje të rajonit, vendin model, dhe një vend më të mirë për qytetarët e tij. Ju uroj fat. Dhe ju lutem fitoni.Zoti qoftë gjithmonë me ju dhe bekoftë Malin e Zi, në çdo hap. Faleminderit, Milo që ekziston. Jo vetëm për Malin e Zi por edhe për Shqipërinë, për shqiptarët në Malin e Zi, në Kosovë, kudo në rajon. Zoti qoftë me ju dhe e bekoftë malin e Zi në çdo hap!”

Për ata që folin gjuhën e Konicës dhe çdo gjë që kanë në Mal të Zi e kanë bër me sakrifica të mëdha, Kryeministri i Shqipërië Edi Rama nuk kishte ndonjë fjalë mbështetjeje ose apeli për tu bashkuar në betejën e ashpër kundër serbo-malazezëve.

Ndërkohë lideri i opozitës Lulzim Basha i bëri thirrje gjithë shqiptarëve të dalin masivisht në zgjedhjet parlamentare të 30 gushtit dhe të votojnë listat shqiptare.

“Ju bëj thirrje bashkëkombësve tanë në Mal të Zi që të dalin masivisht në zgjedhjet parlamentare të 30 gushtit dhe të votojnë listat shqiptare.

Të dashur motra dhe vëllezër, nëpërmjet votës tuaj për partitë shqiptare, ju mund të siguroni mbrojtjen e të drejtave dhe interesave tuaja dhe të garantoni një të ardhme më të mirë për fëmijët tuaj.

Ne krenohemi me faktin që shqiptarët në Mal të Zi kanë luajtur rol kyç në arritjen e pavarësisë së Malit të Zi dhe në përmbushjen e aspiratës së anëtarësimit në NATO. Jam i bindur që faktori politik shqiptar do të vazhdojë që në mënyrë konstruktive të japë kontribut të çmuar në përshpejtimin e integrimit europian të Malit të Zi,” tha Basha duke përfunduar:

“Forcimi i përfaqësimit të partive shqiptare në parlament, është një kontribut i shtuar për paqen dhe stabilitetin në vend, për garantimin e të drejtave të shqiptarëve në Mal të Zi dhe për integrimin europian të vendit dhe mbarë rajonit.”