Ambasadori britanik përgënjeshtron Ministrinë e Integrimit dhe…
Ambasadori i Britanisë së Madhe në Kosovë, Ruairí O’Connell, u detyrua sot të përgënjeshtroi Ministrinë e integrimit si dhe të sqaroi interepretimet e ndryshme të deklaratës së vendeve të Quintit, (Shteteve të Bashkuara, Mbretërisë së Bashkuar, Francës, Gjermanisë dhe Italisë) një ditë më parë, për vazhdimin e dialogut Kosovë-Serbi.
Ambasadori O’Connell, tha se nuk ka bërë deklaratat që janë publikuar në media, pasi ka takuar ministren në detyrë të Integrimit Evropian në Qeverinë e Kosovës, Dhurata Hoxha, raporton RFE.
Përmes një postimi në rrjetin social, Facebook, ai ka thënë se gjatë takimit nuk ka komentuar zbatimin e Marrëveshjes së Stabilizim Asociimit, apo të drejtat të njeriut, siç është pretenduar.
“Ne kemi diskutuar për sundimin e ligjit, luftën kundër korrupsionit dhe krimit të organizuar. Unë kam thënë se Kosova është në një pikë kyçe dhe duhet të veprojë për të pastruar politikën nga krimi. Nuk kam vlerësuar punën e institucioneve”, ka thënë ndër të tjera ai.
Sipas ambasadorit britanik, një gjë e tillë ka ndodhur disa herë, andaj teksa është në përfundim të mandatit, kjo është një prej gjërave që nuk do t’i mungojnë nga Kosova.
Në postimin e tij, ai ka përsëritur se Mbretëria e Bashkuar nuk përkrah asnjë parti politike në Kosovë dhe se iu takon qytetarëve të Kosovës që të marrin përgjegjësi dhe të vuajnë pasojat për votën e tyre.
Për dallim nga ambasadori britanik, në faqen zyrtare të ministrisë së Integrimit Evropian, është thënë se gjatë takimit “ambasadori O’Connell, vlerësoi punën e institucioneve duke potencuar zbatimin e MSA-së, reformave si dhe fuqizimin e sundimit të ligjit, luftimin e krimit të organizuar dhe korrupsionit si dhe respektimin e të drejtave të njeriut, në veçanti për procesin integrues, procese këto që duhet bërë edhe më shumë”.
Ndërkohë Ambasadori britanik në Kosovë, Ruairí O’Connell, ka reaguar edhe pas interepretimeve të ndryshme të deklaratës së vendeve të Quintit, (Shteteve të Bashkuara, Mbretërisë së Bashkuar, Francës, Gjermanisë dhe Italisë) një ditë më parë, për vazhdimin e dialogut mes Kosovës dhe Serbisë, që ndërmjetësohet nga Bashkimi Evropian.
Përmes një postimi në rrjetin social, Facebook, Connell, tha se çështja e mbajtjes së zgjedhjeve ose jo, i përket vetëm Kosovës.
“Unë po lexoj ‘komentatorët’ që pretendojnë se deklarata e Kuintit ka qenë thirrje për formim të Qeverisë së re pa zgjedhje. Pse gazetat publikojnë gjëra të pakuptimta, pa na pyetur se çfarë mendojmë? Prandaj qytetarët e Kosovës shpesh ndihen të keqinformuar”, ka thënë ai.
Ambasadori britanik ka vlerësuar se rikthimi i dialogut mes Kosovës dhe Serbisë, dhe arritja e një marrëveshjeje gjithëpërfshirëse është në interes të Kosovës dhe gjithë rajonit.
Prandaj sipas tij miqtë e Kosovës “kërkojnë që ky shtet të jetë gati të bisedojë seriozisht, sa më shpejt që është e mundur”.
Një ditë më parë, përmes një komunikate, vendet e Kuintit kanë kërkuar nga Kosova dhe Serbia të shmangin veprime që do të pengonin një marrëveshje përfundimtare, që siç thuhet, “është e nevojshme për të dyja vendet për të arritur integrim më të madh euro-atlantik dhe përfitime përcjellëse”.
Ata kanë theksuar se një gjë të tillë mund ta bëjnë vetëm kur palët të japin shenja të gatishmërisë për kompromis, për heqjen e pengesave dhe rifillimin e bisedimeve.
Në një përgjigje dërguar Radios Evropa e Lirë nga zyra e kryeministrit në dorëheqje Ramush Haradinaj, është thënë se sa i përket dialogut, Kosova asnjëherë nuk e ka penguar atë, dhe “janë shprehur të gatshëm të ulen në tavolinë, për një marrëveshje finale, ligjërisht të obligueshme, në kufijtë ekzistues dhe që çon në njohje reciproke”.
Në anën tjetër, drejtori i zyrës për Kosovës në Qeverinë e Serbisë, Marko Gjuriq gjatë një konference për media, ka thënë se për Serbinë ekzistojnë disa çështje kontestuese në deklaratën e Kuint-it dhe se Serbia është e hapur për dialog kur të hiqen taksat.
