Ambasadori italian: Droga dhe krimi organizuar shqiptar, kërcënim serioz…

Droga nga Shqipëria drejt Italisë vijon të mbetet një kërcënim serioz për këtë vend. Kështu shprehet në një intervistë për Shekulli, Ambasadori italian në Shqipëri, Alberto Cutillo.

Sipas Cuttillo, duke ditur se në çfarë niveli është krimi i organizuar në Shqipëri, vendi i tij ka shtuar vit pas viti prezencën e organeve të specializuara këtu.

“Qeveria italiane i kushton vëmendje të veçantë çështjeve që kanë të bëjnë me krimin e organizuar në Shqipëri dhe trafikimin e drogës midis vendeve tona.

Kanabisi, së bashku me narkotikë të tjerë dhe me kontrabandën e mallrave të paligjshme përmes Shqipërisë, mbetet një kërcënim serioz për Italinë dhe shtetet e tjera anëtare të BE-së.

Për këtë arsye Italia është shumë aktive në luftën kundër trafikimit dhe në përgjithësi kundër krimit të organizuar: kemi filluar të ndihmojmë dhe të mbështesim Republikën e Shqipërisë që nga viti 1991 – dhe sot ne mund të mbështetemi në shumë instrumente dypalëshe (marrëveshje, protokolle dhe memorandume), mbi çështjet e sigurisë dhe bashkëpunimit policor – gjithnjë me qëllimin për t’i çuar më tej përpjekjet e përbashkëta në luftën ndaj krimit të organizuar”, ka deklaruar Cuttillo.