Ambasadorja e SHBA mbështetje ministres Gjonaj, Meta: Nuk ndaloj askënd të rreshtohet në krahun e grupit falsifikator!
Pas takimin dhe mbështetjes që i dha Ambasadorja e SHBA, Yuri Kim, ministres së drejtësisë, Etilda Gjonaj, për vijimin e Reformës në Drejtësi, Presidenti i Republikës, Ilir Meta, dukshëm i acaruar për mbështetjen ndërkombëtare që po e humbet, sot tha se nuk e ndalon askënd të rreshtohet në krahun e grupit falsifikator!
“Ministrja vazhdon të jetë krenare dhe vazhdon t’i mbajë leksione prokurorisë, kur duhet të përgjigjet te prokuroria, nëse ky institucion është i paanshëm, por kjo është çështje e saj. Nuk ndaloj askënd të rreshtohet në krahun e grupit falsifikator, kushdo qoftë brenda dhe jashtë vendit. Unë si President i Republikës kam bërë çdo gjë, që Reforma në Drejtësi të zbatohet, ashtu siç është në Kushtetutën e Shqipërisë. Se kush e ka minuar zbatimin e suksesshëm të kësaj reforme, bazuar në Kushtetutë, kush ka përkrahur direkt apo tinëzisht miratimin e ligjeve anti-kushtetuese, si në rastin e prokurorit, kush ka bllokuar procesin në KED, kjo është çështje tjetër, që ka dëmtuar dhe shkatërruar themelet e shtetit të së drejtës. Unë jam krenar që kam qenë dhe mbetem gjithmonë në mbështetje dhe zbatim të Kushtetutës së popullit tim,” tha Ilir Meta duke shtuar se as opozita nuk duhet ti ikë përgjegjësive:
“Edhe opozita nuk duhet t’iu ikë përgjegjësive, por duhet të marrë pjesë aktive dhe të japë format e saj në mbështetje të zbatimit të Kushtetutës. Unë kam respektin më të madh për partnerët ndërkombëtarë, për atë që kemi bërë në Kushtetutë, por më vjen keq për të gjithë ata që nuk kanë kontribuuar me integritet dhe përkushtim në respekt të Kushtetutës, por për fat të keq kanë mbështetur, diku hapur, diku tinëzisht, në kundërshtim me Kushtetutën, kapjen e këtij sistemi, që na ka lënë 3 vjet pa gjykata, duke penguar çeljen e negociatave. Nuk ka asnjë vend në Evropë, që të ketë qëndruar edhe një minutë të vetme pa Gjykatë Kushtetuese apo pa Gjykatë të Lartë.”
Ndryshe, dje Ambasadorja amerikane Yuri Kim ka zhvilluar një takim kokë më kokë me ministren e Drejtësisë, Etilda Gjonaj, duke e nxitur të vazhdojë të njëjtin kurs me zhvillimin e Reformës në Drejtësi.
