Ambasadorja e SHBA në AIDSSH, dëshmitë dhe faktet historike, do të ndihmojnë në mospërsëritjen e gabimeve!
Ambasadorja e SHBA-ve në Shqipëri, Yuri Kim, gjatë vizitës në Autoritetin për Informimin për Dokumentet e ish-Sigurimit të Shtetit, u informua nga Kryetarja e AIDSSH, Gentiana Sula, me veprimtarinë e Autoritetit, shtyllat ku mbështetet puna e institucionit dhe sfidat e përditshme.
Me këtë rast Ambasadorja Kim u informua rreth verifikimit të pastërtisë së figurës së zyrtarëve dhe funksionarëve të lartë që është një nga elementët e rëndësishëm të punës së AIDSSH, në kuadër të drejtësisë tranzicionale.
“Deri në 31 mars 2020, për vetingun në drejtësi, KLP, KED, KLGJ, SPAK, Prokurori, janë verifikuar gjithsej 481 kandidatë, nga të cilët 11 figurojnë me dokumente dhe 470 të pastër. Po ashtu, deri më 31 mars 2020, për vetingun në Polici janë verifikuar 78 kandidatë, nga të cilët 5 figurojnë me dokumente. Vendimet përkatëse u janë dërguar institucioneve dhe janë publikuar të shkurtuara në faqen zyrtare të Autoritetit,” vuri në dukje kreu i këtij institucion, Gentiana Sula.
Sekretari i Përgjithshëm i AIDSSH, Skënder Vrioni, informoi Ambasadoren amerikane lidhur me nismat e institucionit për ndryshimin e kuadrit ligjor të Autoritetit, mes të cilave ndryshimet në legjislacionin zgjedhor, duke bërë amendimet e duhura në kuadër të vlerësimit të pastërtisë së figurës së kandidatëve për deputetë, apo kandidatëve për kryetar bashkie.
“Për qëllime të transparencës gjatë fushatave elektrorale në ligjin 10019, datë 29.12.2008, “Kodi Zgjedhor i Republikës së Shqipërisë”, i ndryshuar, ku janë dorëzuar variantet përkatëse të propozuara; ndryshimet në ligjin 139/2015 “Për vetëqeverisjen vendore”, kalimin në AIDSSH të të gjithë kandidatëve të pushtetit vendor që do të marrin pjesë në procesin zgjedhor, si në poste drejtuese, ashtu edhe për anëtarë të këshillave vendorë, si dhe disa shtesa e ndryshime në ligjin 112/2013 “Për Dekoratat, Titujt e Nderit, Medaljet dhe Titujt Vendorë të Nderit në Republikën e Shqipërisë”, në drejtim të verifikimit nga AIDSSH të pastërtisë së figurës së personit që propozohet për të marrë medalje, dekorata apo tituj nderi,” tha Sekretari i Përgjithshëm i AIDSSH, Skënder Vrioni, duke shtuar se ndryshime për mirëfunksionimin e punës janë kërkuar edhe në ligjin specifik të AIDSSH, të cilat kanë të bëjnë kryesisht me saktësimin e informacionit mbi dokumentet e ish-Sigurimit të Shtetit, prej nga kanë ardhur veprime interpretuese të gjykatave mbi vendimet e Autoritetit, ndaj synohet përmirësimi dhe pasurimi i korpusit ligjor të AIDSSH.
Në takim, u vu theksi edhe te çështja e mijëra të zhdukurve me forcë në komunizëm dhe veprimtaria e AIDSSH për qartësimin e fatit të tyre. Lidhur me këtë çështje, kryetarja e Autoritetit, Gentiana Sula, tha se përtej hapave konkretë në këtë drejtim dhe projekteve të ndërmarra, janë të nevojshme ndërhyrje ligjore që e lehtësojnë procesin e kërkimit, identifikimit dhe zhvarrimit të viktimave, dhe bashkërendojnë punën e institucioneve.
“AIDSSH, e mbështetur në vite nga partnerë e homologë për veprimtaritë komplekse, ka punuar sistematikisht për kthimin e vëmendjes në kampin me tela me gjemba të Tepelenës, me aktivitete të përvitshme me praninë e të mbijetuarve të kampit dhe familjarëve të tyre, studiuesve, grupeve të interesit dhe të rinjve, për muzealizimin e tij dhe bërjen të vizitueshëm për të gjithë.”
Historia e kampit të Tepelenës, ashtu si historitë e përndjekjes së familjeve, intelektualëve, elitës, e shumë të tjerëve, që në moshë të mitur e përgjatë gjithë jetës, ”lufta e klasave” dhe pasojat e saj gjatë diktaturës gjysmëshekullore nuk njihen sa duhet nga shoqëria e sotme shqiptare dhe kryesisht të rinjtë, për shkak të mungesës së trajtimit të plotë në kurrikulat shkollore të narrativës së komunizmit, u informua në AIDSSH Ambasadorja e SHBA në Shqipëri, Yuri Kim. Nëse do të trajtohet duke u bazuar në fakte historike dhe dëshmi, kjo do të ndihmonte në mospërsëritjen e gabimeve në të tashmen.
Ndryshe, gjatë vizitës në AIDSSH, Ambasadorja amerikane Yuri Kim ishte e shoqëruar nga Shefi i Seksionit Politik dhe Ekonomik pranë Ambasadës së SHBA në Tiranë, Lan Crawford.
