AmCham: Heqja e tatimfitimit te biznesi i vogël është pozitive, kujdes me informalitetin

Dhoma Amerikane e Tregtisë, AmCham, vlerëson se ndryshimet e pritshme fiskale për heqjen e tatimfitimit për biznesin e vogël deri në vitin 2029, si dhe mundësia për përjashtimin e biznesit të vogël nga TVSH janë nisma pozitive, për rimëkëmbjen e biznesit të dëmtuar nga COVID-19. Përfaqësues të Dhomës Amerikane të Tregtisë thonë se nevojitet një plan afatgjatë 10-vjeçar për shmangien e informalitetit.

“Heqja e tatimit mbi fitimin dhe potencialisht edhe TVSH-së për bizneset e vogla në harkun kohor të 10 vjetëve, është një lajm pozitiv për komunitetin e biznesit. Në rastin e biznesit të vogël, heqja e tatimit mbi fitimin i jep mundësinë atij që të formalizohet dhe të deklarojë xhiron reale të tij, pa rrezikuar taksim më të lartë. Ky është në fakt një lajm i mirëpritur për komunitetin e biznesit të vogël që është dëmtuar shumë nga COVID-19.

Por duhen përmendur gjithashtu dhe rreziqe potenciale që lidhen me informalitetin, siç është mundësia e fragmentimit të bizneseve të mesme në biznese më të vogla. Në çdo rast, një plan afatgjatë 10-vjeçar do shtojë sigurinë e bizneseve të vogla apo fillestare për investime afatgjata, pra kjo përbën një zhvillim pozitiv.”

Drafti për Amnistinë Fiskale, sipas përfaqësuesve të Dhomës Amerikane të Tregtisë, duhet të garantojë besueshmëri të plotë te komuniteti i biznesit dhe të ketë përcaktime të qarta ligjore, që shmangin çdo përdorim të mundshëm të tij për përfitime të errëta korruptive.

“Ne mendojmë që procesi i përgatitjes së ligjit duhet të ndiqet nga tre faktorë të rëndësishëm. Së pari, të sigurohet një konsultim i gjerë publik me grupet e interesit. Mendimet e tyre duhet të përshihen atje ku është e vlefshme, në mënyrë që drafti të përmirësohet.

Së dyti, është kritike që këshillat e Partnerëve Ndërkombëtarë të merren në konsideratë për të shmangur probleme potenciale me vlerësimin e Shqipërisë nga institucionet ndërkombëtare. Së treti, duhet të garantohet shmangia e pastrimit të parave. Fatkeqësisht, Shqipëria bëri hapa prapa këtë vit.

MONEYVAL, Komiteti i Ekspertëve në Këshillin e Europës e përfshiu Shqipërinë përsëri në listën gri të pastrimit të parave, pas daljes prej saj në vitin 2015. Është e rëndësishme pra që ligji të rrisë besimin e investitorëve dhe institucioneve partnere ndërkombëtare dhe jo ta ulë atë. Plotësimi i këtyre kritereve do orientojë dhe vlerësimin tonë për ligjin.”/Monitor/