“Anëtarësimi në KiE”, sot takohen Zv/Ministrat e Jashtëm, përcaktohet agjenda e 16 dhe 17 Majit

Në Strasburg, sot pritet të takohen Zv/Ministrat e Jashtëm të vendeve anëtare të Këshillit të Evropës, KiE.

Sipas njoftimit në faqen e Këshillit të Evropës, Zëvendësministrat do ta përgatisin agjendën për takimin e Komitetit të Ministrave që mbahet më 16-17 maj.

Ndërsa Kryeministri Albin Kurti përmes rrjetit social X, takimin e djeshëm me Ambasadorët e Quintit e ka lidhur pikërisht me takimin e sotëm në Strasbourg.

“Para takimit të nesërm në Këshill të Evropës rreth agjendës së Komitetit të Ministrave, u takova me ambasadorët Quintit dhe BE-së dhe kujtova se Asambleja dhe Raportuesja Dora Bakoyannis kanë konkluduar se Kosova i ka plotësuar të gjitha kriteret për anëtarësim,” shprehet Kryeministri Kurti përmes rrjetit social X.

Ndryshe, Kryeministri Albin Kurti, përveç ambasadorëve të Quintit, ka bërë të ditur se është takuar edhe me ambasadorët e Holandës, Belgjikës si dhe atë të Suedisë, ku temë kryesore ka qenë anëtarësimi i Kosovës në KiE.