Anulimi 30 Qershorit/ Fajet i ka Opozita, Meta: Do të digjnin Kuvendin e Shqipërisë!

Seanca dëgjimore e Komisionit Hetimor parlamentar për shkarkimin e Presidentit të Republikës me Ilir Metën ndonëse kishte një pritshmëri të madhe rezultoi me një paraqitje të beftë të Metës dhe argumentave të tij për çështjen kryesor: anulimin e datës së zgjedhjeve, 30 Qershor!

Pas citimit të praktikës së Gjykatës Evropiane të Strasburgut dhe një mori të ligjeve evropiane, Presidenti Ilir Meta për herë parë zbuloi sot në Komisionin Hetimor për shkarkimin e tij, se kishte një informacion sekret dhe të klasifikuar, të cilin e mori një ditë para se të shfuqizonte 30 Qershorin si datën e  mbajtjes së zgjedhjeve lokale në vend.

Dhe duke folur me gjuhën e atij që e zgjodhi, Edi Ramës, sot na del sipas Ilir Metës se fajet i ka opozita, sepse duke u bazuar në burime tërësisht të besueshme të Presidentit, opozita do të digjte Kuvendin e Shqipërisë dhe ai e parandaloi këtë “djegie” duke anuluar zgjedhjet e 30 Qershorit!

Show i Ilir Metës apo…

Presidenti i Republikës, Ilir Meta e priti i relaksuar thirrjen e Komisionit Hetimor parlamentar të ngritur për shkarkimin e tij dhe tha se të hënën e 9 Shtatorit 2019 do të jetë në Komision në orën 09:59.

Kështu dhe ndodhi, dhe Presidenti i shoqëruar nga Këshilltar për Sigurinë, Bahri Shaqiri, Këshilltari Ligjor, Bledi Dervishaj dhe Këshilltari për Media, Tedi Blushi, ka mbërritur në Kryesinë e Kuvendit me shumë pompozitet, kamera dhe ecje në këmbë që nga Presidenca.

Pasi është ulur përballë anëtarëve të Komsionit, punimet i ka çelur Kryetari i Komisionit Hetimor, Ulsi Manja, duke argumentuar objektin e ngritjes së këtij Komisioni:

“Zoti President, jeni thërritur për të dëshmuar si personi ndaj të cilit Kuvendi i Shqipërisë, ka iniciuar një procedurë shkarkimi nga detyra juaj për shkeljen e rëndë të kushtetutës, mbi bazën e kërkesës së 55 deputetëve të Kuvendit. Bazuar në ligjin për komisionet hetimore ju mund të jepni shpjegimet tuaja për të sqaruar rrethanat e çështjes, të depozitoni çdo provë që e çmoni se sqaron objektin e hetimit parlamentar, të kërkoni pyetjen e dëshmitarëve ose marrjen e provave të tjera nga komisioni hetimor, por brenda afatit të punës së përcaktuara nga komisioni,” tha Manja, duke shtuar më tej se mbledhja e gjitha do të inçizohet.

Më pas fjalën e ka marrë Ilir Meta:

“Gjykova tepër të arsyeshme dhe të domosdoshme që të jem këtu, sepse kam bindje të plotë që cdo politikan, aq më tepër kryetari i shtetit duhet të tregojë respekt ndaj institucioneve dhe të japë shembullin e bashkëpunimit por së dyti e jam i bindur që pavarësisht se Kuvendi e ka bërë gjykimin para e të nisë hetimin, përmes rezolutës, në interes edhe të transparencës edhe të ndriçimit të çështjeve që kanë të bëjnë me vendimmarrjen për të dhënë të dhëna të tjera që mendoj se u shërbejnë të gjithëve për tu qartësuar më shumë,” tha Ilir Meta i bindur edhe para Komisionit se ka mbrojtur të drejtën e zgjedhjes së qytetarëve shqiptarë dhe ka shmangur një proces jo demokratik të votimit me një kandidat.

“Duke nxjerrë dekret ka mbrojtur të drejtën e zgjedhjes së qytetarëve shqiptarë dhe ka shmangur një proces jo demokratik të votimit me një kandidat. Kjo ishte sa i takon të drejtës së zgjedhjes, nëse e ka respektuar, mbrojtur, apo e ka cenuar apo dëmtuar të drejtën e zgjedhjes së shqiptarëve”.

Ndërsa u mundua të sqaroi se në raport me detyrimet ndërkombëtare të vendit, e ka për detyrë më shumë edhe se vetë qeveria të garantojë detyrimet ndërkombëtare të vendit.

“Presidenti i Republikës për shkak të vendimit shumë të qartë të marrë nga Gjykata Kushtetuese lidhur me kompetencat dhe përgjegjësitë e tij, si kreu i shtetit në raport me detyrimet ndërkombëtare të vendit, e ka për detyrë më shumë edhe se vetë qeveria të garantojë detyrimet ndërkombëtare të vendit. Për këtë arsye mandati i Presidentit është 5 vjecar, kurse i qeverisë është 4 vjecar, pra që të garantojë vazhdimësinë e këtyre detyrimeve.”

Me këtë rast Presidenti paraqiti një vendim të Gjykatës së Strasburgut, të vitit 2015, që gjykoi se zgjedhjet me një kandidat janë fiktive.

“Gjykata e Strasburgut, në vitin 2015, ka marrë një vendim që ka ardhur si rezultat i shqyrtimit të një çështje të ngjashme kundër Bullgarisë, ku disa shtetas bullgarë me origjinë turke kanë pretenduar shkeljen e të drejtës së votës së tyre. Gjykata ka arsyetuar se: e drejta e votës e garantuar nga neni 3 i Protokollit nr.1 nuk është e limituar në veprimin e zgjedhjes së një kandidati dhe hedhjen e votës në kutinë e votimit. Vota e çdo zgjedhësi duhet të krijojë mundësinë e këtij të fundit të ndikojë në formimin e organeve ligjvenëse, në të kundërt e drejta votës, procesi i zgjedhjeve dhe për rrjedhojë edhe rendi demokratik në përgjithsësi, do t’i mungonte e drejta në substancën e saj. Pra, të thuash zgjedhje me një kandidat do të thotë të bësh një proces fiktiv, pra qytetarëve u mohoet e drejta për të zgjedhur. Për këtë çështje, Bullgaria u dënua me një gjobe të caktuar.”

Për ta thyer monotoninë e këtij show me konventa dhe detyrime ndërkombëtare, Presidenti Ilir Meta zbuloi sot në Komisionin Hetimor arsyen kryesore që e shtyri të anuloi datën e zgjedhjeve 30 Qershor edhe pse ishte paksa e çuditshme. Një informacion sekret dhe i klasifikuar, që mori një ditë para se të shfuqizonte 30 qershorin si datën e  mbajtjes së zgjedhjeve lokale në vend, dhe të cilin tha se mund t’ia ofronte Komisionit kur anëtarët të pajisen me Çertifikatë Sigurise, theksonte se opozita do të digjte Kuvendin e Shqipërisë, gjë që sipas Metës kjo qetësoi situatën:

“Presidenti për shkak të detyrës së tij ka pasur informacione të mjaftueshme si në rrugë zyrtare dhe shtetërore, edhe përmes burimeve të tjera për përpjekje për të organizuar akte destabilizimi në vend. Në mënyrë të vecantë në datën 7 qershor një ditë para se presidenti të bënte publik vendimin për shfuqizimin e datës 30 qershor ka marrë një informacion që është sekret dhe i klasifikuar, nëse komisioni do të njihet mund të ndodhë, pasi të merrej leja dhe te verifikohen certifikatat e sigurisë të anëtarëve të komisionit. Me pak fjalë, ky informacion bënte të qartë që persona të caktuar do të përpiqeshin të shfrytëzonin mitingun e opozitës më 8 qershor, edhe për djegien e kuvendit të Shqipërisë.”

Për të balancuar fajin me të cilin e ngarkoi opozitën si shkaktare e anulimit të datës së zgjedhjeve 30 Qershor, Presidenti i Republikës, Ilir Meta, tha se të dyja palët kishin dhënë shembull të shkëlqyer për të ecur përpara në rrugën e konfliktit pa marrë përgjegjësitë e asaj që mund të ndodhte:

“Ky ishte informacion i besueshëm, po të kishe parasysh pasojat nga këto protesta e konfrontime, i keni parasysh deklaratat e ministrisë së Brendshme për shumë policë të plagosur, duke e kombinuar këtë informacion mora atë vendim. Një ngjarje e cila mund të prodhonte pasoja për jetën e qytetarëve dhe shkatërrim të imazhit të vendit tonë që me aq ngjarje që ishin bërë deri në atë moment ishte shkatërruar. Historia e vendit tonë për fat të keq nga 2 prilli e deri në 21 janar është plot me ngjarje të tilla të hidhura ku përmes protestave e gjatë protestave kemi pasur viktima dhe isha i bindur se ishte detyra ime që të bëja gjithcka që në datën 8 Qershor të evitohej në mënyrë të padiskutueshme një ngjarje e tillë e të krijoja mundësi për një dritare e reflektim midis palëve sikurse e thotë edhe qartë raporti i OSBE-ODIHR pra gjithcka ishte antagonizëm i përbashkët i dy palëve që dëmtonte dhe cënonte integritetin e zgjedhjeve në Shqipëri. Antagonizëm do të thotë armiqësi, kështu që në këto kushte, kjo do të ishte një goditje shumë e fortë jo thjesht për zgjedhjet e 30 qershorit, por kthim i madh mbrapa per vendin. Të dyja palët kishin dhënë shembull të shkëlqyer për të ecur përpara në rrugën e konfliktit pa marrë përgjegjësitë e asaj që mund të ndodhte. Jam i detyruar të shoh interesin kombëtar të vendit si president.”

Seanca vazhdoi me pyetjet e deputetëve ndonëse nuk është e qartë nëse është show i Ilir Metës apo Edi Ramës.