Anulohet vizita e Lavrovit në Serbi

Rusia ka fajësuar Perëndimin pasi Ministri i Jashtëm rus, Sergei Lavrov, ka anuluar vizitën në Serbi, meqë shtetet përreth kanë mbyllur hapësirën ajrore për avionin e tij.

Zëdhënësja e Ministrisë së Jashtme ruse, Maria Zakharova, e ka konsideruar vendimin një tjetër kanal të mbyllur të komunikimit, në disa komente që janë përcjellë nga agjencitë ruse të lajmeve.

Mediat në Serbi kanë raportuar se Bullgaria, Maqedonia e Veriut dhe Mali i Zi, kanë mbyllur hapësirat ajrore për avionin e kryediplomatit rus.

Ministria e Punëve të Jashtme në Shkup ka konfirmuar për RFE se Maqedonia e Veriut ka refuzuar kërkesën e Ambasadës së Federatës Ruse për shfrytëzimin e hapësirës ajrore të këtij shteti për fluturimin e avionit të ministrit të Jashtëm rus, i cili ka paralajmëruar se do të vizitojë Beogradin të hënën.

Kërkesa e Ambasadës Ruse është bërë pavarësisht se Maqedonia e Veriut më 28 shkurt ka vendosur sanksione ajrore ndaj Rusisë, pas pushtimit të Ukrainës më 24 shkurt.

Presidenca e Serbisë ka bërë të ditur se në vend të takimit të presidentit serb, Aleksandar Vuçiç me Lavrovin, lideri serb do të takohet me ambasadorin e Rusisë në Beograd, Aleksandar Bocan Harchenko.

Serbia, vend që ka lidhje të ngushta kulturore me Rusinë, raporton RFE, e ka përballuar presionin për të marrë qëndrimin për luftën e Rusisë në Ukrainë dhe nuk u është bashkuar sanksioneve të Perëndimit kundër Moskës.

Presidenti rus, Vladimir Putin dhe homologu i tij serb, Aleksandar Vuçiç janë pajtuar muajin e kaluar që Rusia të vazhdojë të dërgojë gaz natyror në Serbi, derisa disa shteteve u është bllokuar furnizimi për shkak se kanë refuzuar të paguajnë në rubla ruse.