Zjarr në Ishullin e Sazanit, Peleshi: Situata vijon të jetë kritike!
Ndonëse kanë kaluar më shumë se 24 orë që efektivë të ushtrisë, zjarrfikësve dhe zonave të mbrojtura kanë punuar intensivisht për shuarjen e zjarrit në Ishullin e Sazanit, ai ende nuk është vënë nën kontroll. Ministri i Mbrojtjes, Niko Peleshi, raporton se situata vijon të jetë kritike, pasi flakët përhapen për shkak edhe të erës ndërsa është rrezikuar qëndrimi në zonë.
“Prej orëve të para të ditës ka rinisur puna për shuarjen e zjarrit në ishullin e Sazanit. Situata vijon të jetë kritike, pasi flakët përhapen për shkak edhe të erës. Është shtuar numri i efektivëve që janë angazhuar në aksionin e shuarjes së zjarrit, me pjesëtarë të Flotiljes Detare në Pashaliman, efektivë të Forcave Speciale, zjarrfikëses së Vlorës dhe vullnetarë,” thekson ministri i Mbrojtjes, Niko Peleshi në reagimin e tij përmes rrjetit social Facebook duke përfunduar”
“Tymi i krijuar rrezikon qëndrimin në zonë, ndërsa përpjekjet po vijojnë për të mbajtur situatën nën kontroll.”
Ndryshe, mëngjesin e djeshëm është identifikuar vatra e zjarrit në ishullin e Sazanit dhe mbi 80 efektivë të ushtrisë, zjarrfikësve dhe zonave të mbrojtura kanë punuar intensivisht për shuarjen e zjarrit por nuk kanë arritur dot ta vendosin në kontroll ende.
Rreziku më i madh për ata që janë pjesë e shuarjes së zjarrit, mësohet të jenë municionet e ngelura nga viti 1997 të cilat mund të shpërthejnë. Megjithatë operacioni për shuarjen e flakëve vijon.
