Ulqini zgjohet me tërmet

Sot Ulqin u zgjua me tërmet ndërsa shqetësoj edhe banorët e Shkodrës dhe Durrësit! Sipas Entit të Sizmologjisë së Malit të Zi tërmeti ra në orën 6:16 me epiqendër 5 kilometra në juglindje të Ulqinit. Tërmeti ishte me magnitudë 4.1 të shkallës Rihter, thellësi 12 kilometra, dhe intensitet në epiqendër prej V-VI ballë.

“Në bazë të modelit teorik të fushës makrosizmike të këtij rajoni, magnitudës dhe tërmetit, dhe thellësisë së hipoqendrës, ky tërmet ka mundur të shkaktoj vetëm dëme të vogëla materiale në zonën e epiqendrës,” thekson Enti i Sizmologjisë dhe Hidrometeorologjisë së Malit të Zi ndërkohë Qendra Mesdhetare e Sizmologjisë, EMSC, raporton se epiqendra e tërmetit ishte në Detin Adriatik, 12 kilometra nga Ulqini dhe 63 kilometra nga Durrësi.

EMSC raporton për tërmetin i cili ra në orën 06:16 me magnitudë 4.0 të shkallës Rihter dhe thellësi 2 kilometra.

Ndryshe, një ditë më parë Enti i Sizmologjisë dhe Hidrometeorologjisë së Malit të Zi ka raportuar për një tërmet i cili ra në orën 14:20 me magnitudë 2.6 të shkallës Rihter dhe thellësi 20 kilometra, me epiqendër 4 kilometra në juglindje të qytetit të Danillovgradit.