Arllat-Malishevë, aksident i rëndë, 1 i vdekur dhe 6 të lënduar

Një person ka humbur jetën si pasojë e një aksidenti të rëndë që ka ndodhur në rrugën Arllat-Malishevë mbrëmjen e sotme.

Në këtë aksident janë përfshirë katër automjete ndërsa kanë të mbetur të lënduar edhe 6 persona të tjerë.

Zëdhënësja e Drejtorisë Rajonale të Policisë së Prishtinës, Flora Ahmeti, tha për KosovaPress se vdekjen e viktimës e ka konstatuar ekipi mjekësor në vendngjarje ndërsa të lënduarit janë dërguar për trajtim mjekësor.

“Rreth orës 20:30, në rrugën Arllat-Malishevë ka ndodhur një aksident trafiku ku kanë qenë të përfshira 4 automjete. Bazuar në të dhënat e deritanishme, si pasojë e aksidentit janë lënduar shtatë persona. Njëri nga personat e lënduar nuk ka arritur të përballojë plagët dhe i njëjti ka ndërruar jetë. Vdekjen e viktimës e ka konstatuar ekipi mjekësor në vendngjarje. Personat e tjerë janë dërguar për trajtim mjekësor ndërkohë që me hetimin e rastit po merren hetuesit rajonal të komunikacionit rrugor,” sqaroi Flora Ahmeti.