Gjukanoviç refuzon propozimin për tërheqjen e ambasadorëve

Presidenti i Malit të Zi, Millo Gjukanoviç, refuzoi të nënshkruajë dekretin për tërheqjen e shtatë ambasadorëve dhe kërkoi një shpjegim lidhur me pretendimet se ata kishin punuar kundër interesave të shtetit.

“Një vlerësim i tillë meriton një shpjegim. Së pari, për shkak të njerëzve në fjalë. Jo më pak e rëndësishme, për shkak të vendeve pritëse ku ata kryejnë detyrën e ambasadorit. Dhe nuk është e parëndësishme, edhe për shkak të presidentit malazes i cili nënshkroi letra kredenciale duke i rekomanduar ata te krerët e shteteve pritëse,” tha Gjukanoviç duke shtuar se nëse do ta nënshkruante dekretin, kjo do të thoshte se ai pajtohej me ato vlerësime politike dhe hakmarrëse.

Ministri i Jashtëm i Malit të Zi, Gjorgje Radulloviç, raporton RFE, tërhoqi ambasadorët malazezë: në Kinë, Darko Pajoviç, në Serbi, Tarzan Millosheviç, në Emiratet e Bashkuara Arabe, Dushanka Jekniç, në Vatikan, Miodrag Vllahoviç, në Itali Sanja Vllahoviç, në Bosnjë dhe Hercegovinë, Obrad Misho Stanishiç dhe ambasadoren në Gjermani, Vera Kulish.

Në mes të dhjetorit, qeveria e re malazeze e kryeministrit Zdravko Krivokapiç, propozoi tërheqjen e shtatë ambasadorëve të emëruar nga ish-qeveria e Partisë Demokratike të Socialistëve e presidentit, Millo Gjukanoviç dhe sipas Ligjit për Punët e Jashtme, dekreti duhet të nënshkruhet nga presidenti Gjukanoviç.

Refuzimi i këtij dekreti nga Presidenti i Malit të Zi, Millo Gjukanoviç pas refuzimit të dekretimit më 2 janar të amendamenteve të Ligjit mbi liritë fetare, së bashku me gjashtë ligje të tjera, që u miratuan nga koalicioni qeverisës.

Qeveria e re, e zgjedhur më 4 dhjetor, është e para, pas tre dekadash, që nuk udhëhiqet nga Partia Demokratike e Socialistëve.