Armiku i egër i votës, Berisha: Beteja jonë, largimi i Edi Ramës nga pushteti!

Akt korruptiv mafioz më madhor, e cilësoi sot Kryetari i Partisë Demokratike, përjekjen për të rrënuar Sali Berishën ndërsa u zotua se PD do të bëjë një betejë të pamposhtur për të nxjerrë në dritë çdo fakt të “Skandalit McGonigal”.

Demokratët u interesuan lidhur me ecurinë e fatit të PD në Gjykatën e Apelit, për të cilën Kryetari i Partisë Demokratike se nuk ka kurrfarë problemi ndërsa sqaroi se e gjithë beteja opozitare ka të bëjë me largimin e Edi Ramës nga pushteti.

“Sot pas 32 vitesh, për ironinë më të madhe të fatit, vendi që kontribuoi më shumë se kushdo tjetër në përmbysjen e sistemit komunist në Europë, dëshmohet, apo eksponentë të këtij vendi në zbulim, në demokraci, dëshmohen mbështetësit më fanatikë të regjimit të Edi Ramës.

Angazhohen me të gjithë potencialin e shtetit të tyre të madh, vendit të lirisë, për rrënimin e opozitës shqiptare dhe shndërrimin e Shqipërisë në një shtet monopartiak siç ka qenë 46 vite. Sundim i cili nuk bazohet më në doktrinën marksiste dhe leniniste, por në krimin, drogën dhe vjedhjen.

Është tragjike kur mendon se si pasaardhësi i Spiro Kolekës, pasardhësi i Kristaq Ramës, xhelatë të vërtetë të diktaturës, korrupton një nga njerëzit më të fuqishëm në fushën e zbulimit në planet, për të shkatërruar opozitën shqiptare, PD-në.

Dhe kjo vazhdon me aktin korruptiv mafioz madhor. Pasi e futën në thes ish-kreun e PD, tani duhet të rrënonin edhe një njeri tjetër, që kishte vetëm autoritet moral dhe asnjë fuqi vendimmarrëse në PD prej 8 vitesh, duhej të rrënonin Sali Berishën.

Këtu mafia e Sorosit, në një lobim korruptiv me Ramën, ia dolën të fitojnë të marrin firmën e Blinken për shpalljen non-grata të një njeriu që gjatë karrierës kishte dy epitete: shumë pro-amerikan dhe i pakorruptuar.

Mbi bazën e kësaj linje, guvernatorja Yuri Kim u shndërrua në mbështetësen më fanatike të organizatës kriminale të Edi Ramës. Ajo nuk ka gur pa luajtur, nuk la përpjekje pa bërë për të vazhduar kontrollin e plotë ndaj opozitës shqiptare për llogari të Edi Ramës. Nuk la mbështetje pa dhënë, nuk la rast pa treguar fanatizmin e saj në mbështetjen ndaj Edi Ramës dhe kësaj bande mafioze,” tha Sali Berisha gjatë bashkëbisedimit të sotëm me demokratët përmes rrjetit social Facebook ku dhe u zotua me zbardhjen e “Skandalit McGonigal”.

“Çështja McGonigal nuk do të kalojë kurrë si të tjerat. Kjo është një çështje që ka tronditur thellë opinionin publik shqiptar dhe ndërkombëtar.

Çështja McGonigal është simbol i veprimeve më të zeza që një mafie ndërkombëtare ndërmerr ndaj një vendi. Jo më për asgjësimin e dy-tre personave, por të pluralizmit politik.

Të gjithë ata që u implikuan në këtë operacion të turpshëm, do marrin vendin që meritojnë.

Ne jemi të vendosur të bëjmë një betejë të pamposhtur për të nxjerrë në dritë çdo fakt të këtij skandali.

Jemi vendosur të informojmë komisionin hetimor në SHBA, për veprimtarinë kriminale, antidemokratike dhe antikushtetuese të McGonigal dhe të çdo diplomati që ka vazhduar veprën e zezë të shkatërrimit të opozitës.

I pashmangshëm ishte interesimi demokrat lidhur me fatin e Partisë Demokratike ndërsa vazhdon të jetë në duart e Gjykatës së Edi Ramës:

“Vendimi i 25 marsit, që njeh legjitim dhe në përputhje me Kushteuttën, Kuvendin e 11 dhjetorit, është vendim që në çdo vend të lirë të planetit, ka vetëm një kuptim: regjistrimin në regjistrin e forcave politike.

Çdo vendim tjetër është antikushtetues dhe antiligjor.

Nëse Ali Basha ka pasur një të dhënë, një objeksion për vendimin e gjykatës, ai kishte të drejtë të hapte proces gjyqësor në Gjykatën e Tiranës, por ai nuk mund të bëhej palë kurrë në një proces ku nuk ishte palë.

Kështu që bërja palë e Alibashës me ndërhyrjen direkte dhe të fuqishme të Edi Ramës, dhe të McGonigal-it me fustan, siç e ka pohuar vetë, është një akt antikushtetues, antiligjor,” tha Berisha ku dhe u zotua se me ardhjen e PD në pushtet reformimi i sistemit të drejtësisë do nisë me referendum.

“Reformimi i sistemit të drejtësisë, nxjerrja e tij jashtë reformës së George Soros, që e kam cilësuar se është një nga aktet më madhore të korrupsionit ndërkombëtar, ajo do ndodhë.

Nuk ka deklaratë që mund të maskojë dështimin e plotë të kësaj reforme.

Kjo ndërhyrje do fillojë me një referendum popullor. Më pas në bashkëpunim me partnerët ndërkombëtare, ne do ndërhyjmë me reformë të thellë në këtë sistem, që t’ia kthejmë drejtësinë ligjit, që ajo të jetë e pavarur nga guvernatorë dhe mafia ndërkombëtare,” tha Kryetari i PD, Sali Berisha, duke ritheksuar se beteja e Partisë Demokratike është largimi i Edi Ramës nga pushteti, armik ky i egër i votës.

“Edi Rama është armik i egër i votës. E gjithë beteja jonë është largimi i tij nga pushteti. Unë e konsideroj akt patriotik vendimin e çdo emigranti dhe qytetari të diasporës të vijë dhe të votojë në Shqipëri.
Ne do bëjmë gjithçka që të votoni në vendet ku jetoni për zgjedhjet në Shqipëri.

Beteja jonë do të vazhdojë deri në fitoren tonë.”

Në fund, kur zgjedhjet e 14 Majit po aforhen, demokratët pyetën liderin e tyre Sali Berisha edhe për zgjedhjen e kandidatëve për këshilltarë bashkiakë përmes primareve:

“Po punohet, por një vështirësi ekziston në procedurën e kandidatëve për këshilltarë bashkiakë.
Zgjedhja e tyre unë besoj se duhet të bëhet me primare. Natyrisht në këtë rast, komplikimet janë më të mëdha.

Sepse, po marrim Tiranën ose një rreth tjetër. Nëse do ndjekim përfaqësimin, mund të ndodhë që nga lista të dalë një këshilltar që ka marrë 1 mijë vota dhe me listë të listohet një këshilltar që ka marrë 100 vota vetëm për shkak të zonës që përfaqëson.

Ky është një problem i shumanshëm. Juristët kanë një debat të shëndetshëm për këtë procedurë dhe ne po përpiqemi të marrim eksperiencën e të tjerëve për të bërë realitet zgjedhjen e këshilltarëve në gjithë Shqipërinë.”