Arrestohen tre persona për vrasjen e trefishtë në Gllogjan

Policia e Kosovës ka arrestuar tre persona në rajonin e Deçanit lidhur me vrasjen e trefishtë në Gllogjan. Lajmin e ka bërë të ditur Kryeprokurori i Prokurorisë Themelore Peje, Agim Kurtmehaj duke shtuar se për shkak të ndjeshmërisë së rastit nuk mund të japin detaje.

“Pas ndodhjes së rastit kemi filluar hetimet intensive me ndihmën e Prokurorisë së Shtetit. Pas punës intensive janë arrestuar tre persona me dyshimin se kishin kryer veprën penale të vrasjes së rëndë. Prokuroria i ka ndaluar për 48 orë,” tha Kryeprokori Agim Kurtmehaj duke u zotuar se rasti do të ndriçohet deri në fund.

“Nuk mund të japim informata të tjera që do të mund ta dëmtonin procesin e hetimeve. Ne si Prokurori zotohemi se edhe pas arrestimit të tyre, do të vazhdojmë me intensitet të shtuar për ta ndriçuar këtë rast deri në fund. Për shkak të ndjeshmërisë së çështjes, nuk mund të marrim pyetje.”

Ndryshe, më 26 nëntor në sulmin ndaj një autobusi të linjës Gjakovë-Deçan mbetën të vdekur 3 persona, dy nxënës dhe shoferi.