Arrestohet Drejtori i Korporatës Energjetike të Kosovës

Arrestohet Drejtori i Korporatës Energjetike të Kosovës, KEK, Nagip Krasniqi.

Prokuroria Speciale e Kosovës tha sot se është arrestuar një person me inicialet N.K, nën dyshimet për tre vepra penale.

I arrestuari dyshohet për veprat penale: Keqpërdorimi i pozitës apo autoritetit zyrtar, ushtrim i ndikimit dhe konflikt interesi, thanë autoritetet.

Prokuroria Speciale tha se gjatë aksionit të zhvilluar sot është bastisur zyra e të dyshuarit në Prishtinë, dy banesa në kryeqytetin e Kosovës që ishin në pronësi të tij, me qëllim që të gjenden dëshmi “që kanë të bëjnë me veprat penale të lartcekura”.

“Gjatë bastisjes janë sekuestruar dokumente të ndryshme që ndërlidhen me rastin, pajisje elektronike si tre kompjuterë, një llap-top, një celular, një USB, në cilësi të provave materiale që do të shërbejnë për procedurën e mëtejme,” thekson Prokuroria Speciale e Kosovës një njoftimi.

Drejtorit të Korporatës Energjetike të Kosovës, KEK, Nagip Krasniq, sipas autoriteteve të drejtësisë, i është caktuar masa e mbajtjes prej 48 orësh.