Arrestohet i dyshuari për vrasjen e gazetares bullgare

Policia bullgare ka ndaluar të dyshuarin për vrasjen e gazetares, Victoria Marinova.

“Ne mund të njoftojmë se një i dyshuar është ndaluar”, raporton Agjencia e lajmeve Reuters, duke ju referuar burimeve qeveritare.

Radioja kombëtare në Bullgari, duke cituar informacione të pakonfirmuara nga ministria e Brendshme, ka raportuar se i dyshuari është një “qytetar rumun me pasaportë nga Moldavia,” por zëdhënësi i ministrisë nuk ka pranuar të komentojë këto raportime, raporton RFE.

Trupi i pajetë i gazetares Victoria Marinova është gjetur në një park afër lumit Danub në qytetin Ruse. Policia tha se Marinova, 30 vjeçare është rrahur brutalisht dhe është dhunuar dhe se hetimet janë duke u zhvilluar si për jetën e saj personale ashtu edhe për atë profesionale.

Ndryshe, Victoria Marinova është gazetarja e katërt e vrarë në BE nga viti 2017, ku janë vrarë, Kim Wall në Danimarkë, Daphne Caruana Galizia në Maltë dhe Jan Kuciak në Sllovaki.