Arrestohet një serb në Graçanicë, dyshohet për krime lufte

Policia e Kosovës ka arrestuar një serb në Graçanicë të dyshuar për krime lufte në Kosovë.

Drejtoria për Hetimin e Krimeve të Luftës pranë Policisë së Kosovës, DHKL, në bashkëpunim dhe me autorizim të Prokurorisë Speciale të Kosovës, ka zhvilluar hetime lidhur me krimet e kryera gjatë periudhës së luftës në Kosovë 1998-1999, ku përmes rrugëve hetimore-operative ka pranuar informacion për të dyshuarin mashkull kosovar serb me iniciale D. M. si pjesëmarrës në këto krime.

Për të dyshuarin D.M. janë siguruar prova për ekzistimin e dyshimit të arsyeshëm se në bashkëkryerje edhe me pjesëtarë të tjerë, gjatë periudhës së luftës në Kosovë në cilësi të personave zyrtar (gardian të burgut) në Prishtinë dhe në paralelen e ndarë nga Prishtina konkretisht në burgun e Lipjanit, në mënyrë sistematike, dyshohet se kanë ushtruar torturë, dhunë fizike, psikike, keqtrajtime dhe maltretime çnjerëzore dhe të skajshme për jetën ndaj të burgosurve shqiptarë.

“Si rezultat i punës dhe hetimeve intensive Policia e Kosovës, me datën 21.06.2023, në orët e paradites, zonën e Graçanicës, ka ndaluar dhe ka shoqëruar në polici të dyshuarin në fjalë. Zyrtarët kompetent nën autoritetin e Prokurorisë Speciale të Republikës së Kosovës dhe urdhrit të gjyqtarit të procedurës paraprake-Departamenti Special, kanë zbatuar kontroll në shtëpinë e të dyshuarit, ku në cilësi të provave materiale janë sekuestruar: një armë zjarri-revole të tipit “Zastava” me kalibër 9mm, 136 fishek të kalibrit 9x19mm, një thikë ushtarake të tipit SOG Speciality Knives, një shufër metalike “Taiwan”, si dhe dokumente, vendime, notes dhe një telefon personal”, thuhet në njoftimin e policisë.

Në konsultim me prokurorin kompetent nga Prokuroria Speciale i dyshuari është intervistuar në prezencë të avokatit mbrojtës të siguruar nga familja, nën dyshimin se D.M. është përfshirë në veprën penale “krime lufte kundër popullsisë civile”.