Atentat te “Astiri”, 2 të vdekur dhe një makinë e djegur në Thumanë
Qytetarë të shumtë ankohen në trafik kur kalojnë në zonën e Astirit dhe nga Ish-Sheshit Shqiponja dhe humbin me orë të tëra, por kjo nuk i ndodhi atentatorëve të mbrëmjes së sotme të cilët ekzekutuan dy persona rreth orës 19:30, dhe arritën të largohen pa u shqetësuar “në drejtim të panjohur”.
Duke dhënë versionin zyrtar, policia konfirmoi se i është bërë atentat një mjeti tip “Audi”, ku si pasojë kanë mbetur të vdekur shoferi dhe pasagjeri i mjetit. Uniformat blu sqarojnë se kanë ngritur pika kontrolli në hyrjet e daljet e qytetit, me qëllim identifikimin dhe kapjen e autorit/ve.
Mësohet se dy viktimat e atentatit të kësaj të shtune në zonën e Astirit në Tiranë janë Erigers Mihasi dhe Armando Dumani, emra këto të njohur për drejtësinë.
Erigers Mihasi është arrestuar në vitin 2019, pasi dyshohet se ka qenë një prej autorëve të grabitjes me armë të banesës së prindërve të Elton Çiçës në Tepelenë. Arrestimi i tij është bërë në Yrshek të Tiranës. Ai fitoi pafajësinë për këtë krim dhe u lirua disa muaj më pas. Po ashtu, emri i tij del edhe në sulmin me armë ndaj kompleksit “Eiffel”, ku Mihasi u raportua si një nga bashkëpunëtorët e sulmit. Ai njihej si mik i ngushtë me Santiago Malkon, ish-policin që u vra më 27 gusht të vitit 2019.
Ndërsa edhe viktima tjetër, Armando Dumani, njihej si një person me precedent penal. Ai mësohet se ka kryer grabitje në një bankë të nivelit të dytë, nën kërcënimin e armës.
Autorët pas ngjarjes, dyshohet se janë larguar drejt zonës së Ish Shqiponjës. Ndërkohë policia ka ngritur pika kontrolli dhe po këqyr kamerat e sigurisë, me qëllim identifikimin dhe kapjen e tyre. Por pavarësisht kaj, siç ndodhë zakonisht pas çdo atentati në Shqipëri, në afërsi gjendet një makinë e djegur.
Automjeti i djegur është gjetur në zonën e Thumanës. Dyshohet se ajo i përket autorëve të atentatit te Astiri në Tiranë. Policia dhe zjarrfikëset janë nisur drejt vendngjarjes.
Njoftimi i Policisë:
Tiranë/Informacion paraprak
Rreth orës 19:30, në vendin e quajtur “2 rrathët” në Unazë të Re, dyshohet se është qëlluar me armë zjarri në drejtim të mjeti tip “Audi”. Si pasojë kanë humbur jetën dy shtetas ende të paidentifikuar, të cilët ishin brenda në mjet.
Menjëherë shërbimet e Policisë kanë shkuar në vendngjarje dhe po kontrollojnë zonën me qëllim identifikimin dhe kapjen e autorit/ve.
Ndërkohë janë ngritur disa pika kontrolli në hyrje dhe dalje të qytetit të Tiranës.
Grupi hetimor nën drejtimin e Prokurorisë punon për sqarimin e plotë e rrethanave të ngjarjes dhe grumbullimin e çdo prove që do çojë në identifikimin dhe kapjen e autorit/ve.
