Bahtiri: Për kufijt administrativ të Mitrovicës nuk ka dialog. Problem është…

Sa i përket kufijve administrativ të Komunës së Mitrovicës, çdo gjë është e qartë dhe nuk do të ketë dialog rreth kësaj çështje. Kështu u shpreh kryetari i Komunës së Mitrovicës, Agim Bahtiri në emisionin “Zyra e Ankesave”, në RTV Dukagjini duke folur rreth problematikave politike të kufijve administrativ në mes të dy komunave, veri-jug si dhe hapjes së urës së Ibrit, për të cilën tha se problemi i vetëm qëndron tek mënyra e hapjes së saj.

” Asnjë centimetër nuk mund ta marr veriu. Absolut jo sepse vendimmarrja e lartë në Prishtinë është pajtuar me mendimin tim dhe si e tillë ka përfunduar dialogu në mes të këtyre dy gjërave, urës dhe kufirit administrativ. Nuk dëshiroj as të ketë dialog në mes të këtyre dy çështjeve”, tha Bahtiri.

Ndërkohë, sipas tij, Bashkimi Evropian dëshiron ta bëj hapjen me ceremoni ndërsa kryetari i Komunës së veriut të Mitrovicës, Goran Rakiç, dëshiron që ajo të bëhet pa ceremoni.

“Nuk besoj që ka probleme politike për tu hapur ura. Mendoj që dëshira e BE-së është që hapja e urës të bëhet me ceremoni, e Rakiç dëshiron që ajo të bëhet në mënyrë normale. Nuk ka problem tjetër,” tha kryetari i Komunës së Mitrovicës, Agim Bahtiri .