Ballkani, Escobar-Kurti: Pëcaktues i paqes dhe stabilitetit…
Kryeministri i Kosovës Albin Kurti, në një bisedë telefonike me Të dërguarin e Shteteve të Bashkuara të Amerikës për Ballkanin Perëndimor, Gabriel Escobar diskutuan rreth zhvillimeve në Ballkanin Perëndimor dhe rëndësinë e paqes dhe stabilitetit në këtë rajon.
Albin Kurti gjatë bisedës mbrëmjen e së premtes tha se integrimi i plotë i Ballkanit Perëdimor në Bashkimin Evropian dhe NATO është përcaktues për garantimin paqes dhe stabilitetit në rajon dhe kontinentin e Evropës.
Në anën tjetër Escobar tha se Shtetet e Bashkuara mbështesin Kosovën dhe synimet e saj drejt integrimeve evropiane dhe euro-atlantike.
Po ashtu u diskutua edhe rreth bisedimeve ndërmjet Kosovës dhe Serbisë të lehtësuara nga Bashkimi Evropian.
Në lidhje me këtë Albin Kurti tha se Kosova angazhohet për një dialog parimor, drejt një marrëveshje ligjërisht të obligueshme në qendër të së cilës është njohja recipropoke.
Ndërkaq Escobar u shpreh se SHBA mbështesin këtë proces dhe janë të përkushtuara që të ketë përparim drejt qëllimit final të tij.
Kryeministri i Kosovës dhe Zyrtari i lartë amerikan zhvilluan një bisedë telefonike edhe më 19 nëntor ku u diskutuan angazhimet në dialogun Kosovë-Serbi dhe nevojën për të parë rezultate dhe progres që përqendrohet në njohje reciproke.
“Në një bisedë telefonike me të dërguarin e Departamentit të Shtetit për Ballkanin Perëndimor Gabriel Escobar është diskutuar për një sërë çështjesh përfshirë reformat demokratike, programin mbi punë dhe drejtësi, angazhimin për dialog dhe nevojën për të parë rezultate dhe progres që përqendrohet në njohje reciproke,” thekson Zyra e Kryeministrit.
