“Ballkani i brishtë”, Stoltenberg: Ka potencial për tensione në Kosovë e Bosnje
NATO beson se situata e sigurisë në Ballkanin Perëndimor është ende shumë e brishtë, dhe ka potencial për tensione në Kosovë dhe Bosnje Hercegovinë.
Kështu tha sot në Bruksel, Sekretari i Përgjithshëm i NATO-s, Jens Stoltenberg, pas takimit me Kryeministrin e Malit të Zi, Milojko Spajiç, raporton RFE.
Ai tha se NATO është e gatshme të kryejë mandatin e saj në Kosovë për të garantuar stabilitet, ashtu sikurse në Bosnje Hercegovinë.
Ballkani Perëndimor, forcimi i NATO-s, dhe përgatitjet për Samitin e Washingtonit, kanë qenë temat kryesore të këtij takimi.
“Situata në rajonin e Ballkanit Perëndimor mbetet e brishtë. Dhuna që ka shpërthyer në Kosovë ishte e papranueshme. Kjo ka bërë që NATO-ja menjëherë të angazhojë forca shtesë në Kosovë,“ tha Stoltenberg.
Këshilli i Atlantikut të Veriut, paralajmëroi ai për javën që vjen, do të vizitojë Bosnje Hercegovinën, për të dëshmuar në këtë mënyrë edhe mbështetjen e parezervë për integritetin territorial dhe sovranitetin e Bosnje Hercegovinës.
Stoltenberg ka falënderuar Malin e Zi për kontributin në misionin e NATO-s në Kosovë, KFOR, por edhe për rolin konstruktiv për paqe dhe stabilitet në rajonin e Ballkanit.
Kryeministri i Malit të Zi, Spajiç, tha se për vendin e tij, stabiliteti në Kosovë ka rëndësi të veçantë dhe, në rast nevoje Mali i Zi është i gatshëm për të rritur praninë e ushtarëve të saj në misionin e KFOR-it.
Spajiç tha se Mali i Zi mbetet anëtar besnik i aleancës së NATO-s, dhe i përkushtuar për të avancuar në procesin e integrimeve në BE.
Milojko Spajiç tha se për vitin 2024, Mali i Zi ka ndarë më shumë se 2 për qind të Prodhimit të Brendshëm Bruto për Mbrojtje, që është në përputhje me kërkesat e NATO-s ndaj të gjitha vendeve anëtare.
Shefi i Aleancës tha se NATO ka bashkëpunim të ngushtë me BE-në, kur janë në pyetje vendet e Ballkanit Perëndimor,
Ai e ka nënvizuar sidomos rëndësinë e mbështetjes së dialogut mes Kosovës dhe Serbisë për normalizimin e raporteve, që zhvillohet nën ndërmjetësimin e Bashkimit Evropian.
Pas sulmeve të armatosura kundër Policisë së Kosovës në Banjskë të Zveçanit, në shtator të vitit të kaluar, ku mbeti i vrarë rreshteri Afrim Bunjaku, NATO ka përforcuar misionin e vet KFOR-in në Kosovë, dhe tani numëron 4.500 pjesëtarë.
Kosova e ka fajësuar shtetin e Serbisë për sulmin, ndonëse kjo e fundit ka mohuar gjithçka. Përgjegjësinë për sulmin e ka marrë Milan Radoiçiç, Ish-Nënkryetar i Listës Srpska, partisë më të madhe të serbëve në Kosovë.
Agjencia Ndërkombëtare e Policisë, INTERPOL, raporton RFE, tashmë ka lëshuar fletarrestin për të.
