Banka e Shqipërisë, bien kreditë

Muaji prill nuk ka qenë i mbarë as për depozitat dhe as për kreditë. Sipas statistikave të Bankës së Shqipërisë, stoku i kredisë për ekonominë ishte 545.7 miliardë lekë në muajin prill, duke shënuar rënie për herë të parë pas tre muajve kur ky tregues kishte njohur një rritje të shpejtë.

Në raport me një muaj më parë, huaja për ekonominë ra me 0.3%, ose 1.5 miliardë lekë më pak. Në këtë tendencë tkurrëse ka ndikuar rënia e huasë në valutë si për bizneset ashtu dhe për individët, por edhe kredia në lekë nuk ka shënuar ndonjë hov.

Me bazë vjetore, huaja për ekonominë është në stanjacion, me një rënie të lehtë prej 0.05%. Sipas Bankës së Shqipërisë duke përjashtuar efektin e kursit të këmbimit dhe të fshirjes së kredive të këqija nga bilancet, huaja për ekonominë ka shënuar një rritje vjetore prej rreth 5%, që gjithsesi mbetet e dobët. Në tre vitet e fundit, rritja e kredisë ka qenë negative, ose minimale, teksa bankat janë treguar të shtrënguara me kriteret e dhënies së huave nga njëra anë dhe nga ana tjetër ata ankohen se mungojnë projektet cilësore nga bizneset.

Në një takim me bankierët, gjatë ditës së djeshme, Guvernatori i Bankës së Shqipërisë Gent Sejko tha se  u shpreh se synohet të arrihet hartimi i një plani konkret masash për përmirësimin e sasisë dhe cilësisë së kreditimit, si dhe të zgjerohet gama e produkteve financiare.

Sejko tha se vëllimi i kursimeve financiare të administruara nga sektori bankar zë rreth 70% të PBB-së, ndërsa vëllimi i kredisë së dhënë prej tij është rreth 35% të PBB-së.

Guvernatori Sejko kërkoi nga përfaqësuesit e sektorit bankar që të reflektojnë një përqasje më aktive në përmbushjen e misionin të tyre kryesor, atë të kreditimit të shëndetshëm të ekonomisë. Për këtë qëllim, Guvernatori Sejko cilësoi si të nevojshme që sektori bankar të ndërmarrë hapat e duhura për të zgjeruar gamën e produkteve të kreditimit si dhe të financojë sektorë të rinj të ekonomisë shqiptare, si bujqësia dhe biznese të tjera inovative në fushën e teknologjisë së informacionit. Ky proces duhet të shoqërohet paralelisht me një vëmendje të shtuar nga ana e sektorit bankar për të treguar kujdesin maksimal në përzgjedhjen dhe financimin e sektorëve që ofrojnë një potencial të lartë kthimi. Gjithashtu është detyrë e sektorit bankar që të plotësojë gamën e produkteve financiare me instrumente derivate të mbrojtjes ndaj rrezikut të kursit të këmbimit për atë kategori kredimarrësish që janë të ekspozuar ndaj tij./Monitor/