Basha: Ligji për Magjistraturën, nëse opozita voton ka nënshkruar shkeljen kushtetuese…
Kreu demokrat Lulzim Basha e ka cilësuar si qesharak propozimin për miratimin e ligjit të Magjistraturës, duke theksuar se nëse opozita do të bëjë një gjë të tillë atëherë do të nënshkruajë me duart e veta shkeljen e Kushtetutës.
Basha ripërsëriti edhe njëherë qëndrimin për kthimin te organet kushtetuese të drejtësisë, që burojnë nga Kushtetuta e miratuar me konsensus të gjerë. Kreu i PD-së akuzoi Kryeministrin Edi Rama se ka vendosur të kapë institucionet e drejtësisë për të shpëtuar të afërmit dhe veten e tij nga burgu, ndërsa kërkoi rikthimin e proçesit në shinat kushtetuese.
Basha e cilësoi bordin e shkollës së Magjistraturës më politik se vetë fondacioni Qemal Stafa, i themeluar pranë PS-së, ndërsa shtoi se kjo provohet fare thjeshtë duke parë përbërjen e tij dhe lidhjet që kanë ato.
“Ata na ftojnë ne, që atë që bëjnë me duart e tyre, shkeljen e Kushtetutës, ta bëjnë me duart tona. Ata kanë një propozim me shtatë pika për kapërcimin e krizës së reformës në drejtësi.
Por nuk e pranojnë sepse duan të shpëtojnë të afërmit dhe veten e tyre nga burgu me kapjen e drejtësisë.
Në vend ti përgjigjeshin ftesës sonë, vijnë me një propozim qesharak, sipas të cilit, mënyrën për të shkelur kushtetutën, mos ta shkruajnë ata, por ne.
Propozimi ynë është kthimi te institucionet e drejtësisë”, u shpreh Basha.
