Basta me “Hotelin Mama“ – e ëma paditë dy djemë

Në Itali njerëzit dëshirojnë të jetojnë gjatë në shtëpinë e prindërve. Çunat e Mamit këtu i quajnë Mammoni. Por tani një gjykatë ka vendosur se me 40 vjet mjaft është. Paditësja ishte vetë mamaja.

Deri sa të mbushësh 40 vjeç mund të jetosh në “Hotel Mama” – por pastaj është fundi: me ndihmën e drejtësisë një 75-vjeçare italiane arriti atë që vullnetarisht nuk po arrinte dot: dy djemtë e saj, që ka kohë që janë rritur, më në fund do t’ju duhet të largohen nga shtëpia e saj.

Sipas vendimit të gjykatës, dy meshkujt – njëri 40 vjeç, dhe tjetri 42 vjeç – duhet të largohen deri në Krishtlinde nga banesa.

Vendimi gjyqësor në qytezën Pavia ka shkaktuar konfuzion në Itali, ku të rinjëve tradicionalisht u duhet më shumë kohë për tu larguar nga kurrizi i prindërve. Gazeta lokale “La Provincia Pavese” raporton se 75-vjeçarja jetonte me djemtë e saj prej se është ndarë nga burri. Në vitet e fundit disa herë ka tentuar ti bind që të largohen vullnetarisht nga “Hotel Mama”. Por, asgjë nuk ndihmoi.

Në fund, mamaja vendosi ti padis dy djemtë e saj. Avokati i saj deklaroi në gjykatë se që të dy janë djemë të punësuar që kanë refuzuar ta paguajnë qiranë ose të ndihmojnë në punët e shtëpisë.

Tepër është tepër!

Gjykatësja Simona Caterbi tani ishte plotësisht dakord me të ëmën e dy djemve. Arsyetimi ligjor: qëndimi në banesë mund të konsiderohet “në fillim i arsyeshëm” sepse bazohet në detyrimet e prindit për ta mbajtur. Por nga “mosha e caktuar” e tutje, më nuk i ka ato detyrime. Gjyqtarja nuk specifikoi këtë moshë në vendim – por me 40 ose 42 vjeç, kufiri dukshëm është shkelur.

Në Itali ekziston një numër relativisht i madh i njerëzve që vazhdojnë të jetojnë me prindër edhe pas moshës 18 vjeç. Sipas një studimi nga viti 2022 i Agjencisë europiane të statistikave, Eurostat, mosha mesatare në të cilën njerëzit janë larguar ishte 30 vjeç. Kryesisht bëhet fjalë për meshkuj. Italianët kanë dhe emërtimin për ta. I quajnë “Mammon” (çunat e mamit) ose “Bamboccioni” (bebe gjigante).

BE, nga 24 – 35 vjet

Për krahasim, në Gjermani mosha mesatare që njerëzit largohen nga shtëpia e prinderve është nën 24 vjeç. Në jug të Europës fëmijët qëndrojnë më gjatë të jetojnë me prindër: në Spanjë dhe Greqi largohen mesatarisht më vonë se në Itali; Në Kroaci meshkujt jetojnë me prindër deri në moshën 35 vjeç. Kjo ka të bëjë dhe me faktin se familjet në jug janë më të lidhura bashkë. Nëse të gjithë ndjehen komod atëherë gjithçka është në rregull. Mirëpo, situata ekonomike gjithashtu luan rol në shumë raste: papunësia, mungesa e qendrave për trajnim, qiratë e larta, në veçanti në qytete dhe inflacioni.

Banka Qendrore e Italisë ka paralajmëruar në një studim për “pasojat serioze ekonomike dhe demografike” nëse të rinjtë e shtyjnë aq shumë kërkimin e punës dhe formimin e familjes.

Për shqetësimin, ka arsyetim: Para pak kohësh Zyra shtetërore e statistikave ka publikuar të dhënat nga viti i kaluar se në Itali, vend me 59 milionë banorë, kanë lindur më pak fëmijë se kurrë më parë: 393.000./DW/