BE e shqetësuar për vendimin rreth ambasadave në Jerusalem

Përkushtimi që kanë shprehur Kosova dhe Serbia pas takimeve të javës së kaluar në Shtëpinë e Bardhë, se do të hapin ambasadat e tyre në Jerusalem, të cilin Izraeli e konsideron si kryeqytet, ka shkaktuar shqetësim të thellë në Bashkimin Evropian.

Zëdhënës i BE-së për Politikë të jashtme dhe Siguri, Peter Stano, tah sot se Bashkimi Europian shpre shqetësim dhe keqardhje serioze për këtë.

Megjithatë, tha ai, vendimi i Serbisë për të bartur selinë e ambasadës nga Tel Avivi në Jerusalem dhe ai i Kosovës që, me vendosjen e raporteve diplomatike me Izraelin, ta hapë edhe ambasadën në po këtë qytet, janë obligime dypalëshe që këto dy palë i kanë marrë ndaj Izraelit. Stano tha se duhet pyetur Kosovën dhe Serbinë se cilat janë motivet dhe pasojat e një vendimi të tillë.

“Asnjë ambasadë e ndonjë vendi të BE-së nuk është në Jerusalem. As zyra e delegacionit të BE-së në Izrael nuk është në Jerusalem,” tha zëdhënësi i BE-së duke shtuar

“Pasi edhe Kosova, edhe Serbia janë shprehur të përkushtuara për integrimet evropiane, si qëllim strategjik, ato edhe duhet të sillen në këtë mënyrë.”

BE ende e konsideron statusin e Jerusalemit si çështje rreth së cilës ka mospajtime mes shtetit të Izraelit dhe autoriteteve palestineze.

Qëkur Shtetet e Bashkuara të Amerikës kanë vendosur ta njohin Jerusalemin si kryeqytet të Izraelit në vitin 2017 dhe në bazë të këtij vendimi ta bartin edhe ambasadën në Jerusalem, nga BE, raporton RFE, asnjë shtet nuk e ka ndjekur një hap të tillë.

BE pret që edhe nga shtetet kandidate, të cilat janë në procesin e anëtarësimit në BE, t’i përshtatin qëndrimet e veta me politikën e jashtme të BE-së.

Ndryshe, më 4 shtator, në Washington, Kosova dhe Serbia kanë arritur një marrëveshje për normalizim ekonomik.

Marrëveshja, e cila është nënshkruar në praninë e presidentit amerikan, Donald Trump, mes tjerash, thotë se Kosova dhe Izraeli pajtohen të njohin njëri-tjetrin dhe se Serbia do ta zhvendosë ambasadën e saj nga Tel Avivi në Jerusalem.