Bekim Jashari: Familja jonë u vetëflijua për lirinë e Kosovës
Djali i heroit, Hamëz Jashari dhe Kryetari i Komunës së Skenderajt, Bekim Jashari, pas homazheve në kompleksin memorial “Adem Jashari” në Prekaz me rastin e përvjetorit të 12 të pavarësisë së Kosovës, tha se populli i Kosovës ka vuajtur shumë për të festuar këso ditë si këtë të pavarësisë së Kosovës dhe se flijimi i familjes së tij ishte me vetëdije vetëm që Kosova të ishte e lirë.
“Sot jemi në 12-vjetorin e shpalljes të pavarësisë, shtetit tonë të shumëvuajtur të këtij populli të pritjes me shekuj për ketë ditë. Këtë vit jemi edhe në prag të 21-vjetorit të çlirimit dhe 22-vjetorit të familjes Jashari. Nj ë rënie një vetëflijim me vetëdije që ne sot jemi të lirë. Ne sot kemi një obligim ta forcojmë dhe ta ndërtojmë këtë shtet por vetëm të bashkuar mund ta bëjmë këtë gjë,” tha Bekim Jashari.
Ndërsa, kryetari i Organizatës së Veteranëve dhe Luftëtarëve të Ushtrisë Çlirimtare të Kosovës, Hysni Gucati duke uruar të gjithë qytetarët e Kosovës 12-vjetorin e pavarësisë së Kosovës tha se Prekazi dhe familja Jashari janë të shenjtë për Kosovën dhe popullin shqiptar.
Gucati: Prekazi, vend i shenjtë
“Ne sot gjendemi në vendin e shenjtë të Kosovës dhe të shqiptarëve ku këtu në Prekaz familja Jashari, shokët e tij bashkëfshatarët e tij, bashkëluftëtarët e tij që dhanë jetën për ditën që ne sot të kemi pavarësinë. Sot ne kemi 12-vjetorin e pavarësisë dhe 22-vjetorin e rënies së komandantit Adem Jashari me familje shumë shpejt data po afrohet,” tha Gucati.
