Beograd, protestë para Presidencës, Vuçiç: Nuk do të lejojë kërcënime përmes dhunës!

Protestuesit serbë sot rreth orës 11:30 kanë filluar protestën para Presidencës serbe, edhe pse mbrëmë me mbylljen e protestës “Një në pesë milionë” u tha se protesta do të fillojë në mesditë. Tensionet e u rritën ndërsa udhëheqësit e opozitës bëjnë përpjekje të qetësojnë situatën pas deklaratave arrogante si të ministrave ashtu dhe vetë, Presidentit të Serbisë, Aleksandar Vuçiç:

“Nuk do të lejojë askënd të kërcënojë përmes dhunës,” tha Vuçiç në daljen e tij publike që e paralajmëroi mbrëmë pasi protestuesit hynë me dhunë në objektin e Televizionit publik të Serbisë, RTS, ku vetëm me ndërhyrjen e forcave speciale të policisë ata liruan godinën.

Aleksandar Vuçiç tha se midis organizatorëve të protestës kishte nervozizëm për “një numër të vogël njerëzish që protestonin”, ku sipas Vuçiçit mbrëmë të pranishëm në protestën përpara Televizionit Shtetëror ishin 1.550 njerëz, raporton RFE.

Duke komentuar protestën e mbrëmshme para RTS, edhe kryeministrja e Serbisë, Ana Bërnabiç tha se shteti nuk do të tolerojë dhunë.

“Ky vandalizëm tregon qartë se që nga dita e parë ata po planifikojnë të shkaktojnë çrregullime dhe të zëvendësojnë qeverinë e zgjedhur në mënyrë legjitime në mënyrë të dhunshme”, tha Bërnabiç për Agjencinë shtetërore të lajmeve, Tanjug.

Ndryshe, mbëmë protestuesit  e “Një në pesë milionë” në Beograd u futën në ndërtesën e Radio Televizionit të Serbisë kërkuar që t’iu jepej hapësirë në televizionin publik. Pjesëtarët e xhandarmërisë serbe i nxorën demonstruesit dhe disa udhëheqës të opozitës nga ndërtesa e RTS, në momentin kur protestuesit po theksonin se këtu censura është aq e tmerrshme sa edhe kjo futje e dhunshme në telelvizionin publik, nuk raportohet në këtë televizion ndonëse praktikisht ishte pushtuar nga protestuesit.

Protestat antiqeveritare “Një në pesë milionë” zhvillohen në Beograd çdo të shtunë, që nga 8 dhjetori të vitit 2018. Ndërkohë, ato janë shtrirë edhe në qytete të tjera të Serbisë.

Në protestën “Një në pesë milionë” marrin pjesë figura publike, politikanë të opozitës, profesorë universitar dhe të tjerë, që kërkojnë më shumë hapësirë në televizionin publik, pastaj zbulimin e urdhëruesve dhe kryesve të sulmeve ndaj qytetarëve, gazetarëve, aktivistëve dhe politikanëve, si dhe publikimin e “Planit për zgjidhjen e çështjes së Kosovës”.

Muajin e kaluar, Freedom House, në raportin e publikuar vjetor, e ka degraduar Serbinë nga kategoria e vendeve të lira në vende pjesërisht të lira.