Bie miti “SPAK”, Ibrahimi: Pse kandidatët nuk u pyetën publikisht!

Këshilli i Lartë i Prokurorisë, KLP, nisi sot procesin e intervistimit të 23 kandidatëve për Strukturën e Posaçme kundër Korrupsionit dhe Krimit të Organizuar, SPAK, dhe që në fillim ra miti për këtë strukturë që do bëjë namin në drejtësi.

Reforma në Drejtësi u bë në emër të popullit, dhe Edi Rama vazhdon e abuzon me këtë qëllim. Sot Edi Rama e konfirmoi se ajo që bëhet në emër të popullit nuk duhet bërë në sy të popullit ndonëse ishte premtuar, dhe pse nuk u bë arsyetimi është ashtu sikur se qeverisja e tij 6 vjeçare: Populli e keqkuproi!

“Ka pas një keqkuptim lidhur me deklaratën e parë. Intervistat janë regjistruar me audio dhe video, por jo që të bëhen publike. KLP është i prirur të jetë i hapur,” tha Babai i Reformës në Drejtësi të Edi Ramës dhe Kryetari i KLP, Gent Ibrahimi, sot pas intervistimit të katër kandidatëve të parë, Altin Dumani, drejtues i komanduar i Apelit për Krime të Rënda, Anita Jella prokurore e Durrësit, Anton Martini prokuror tek Krimet e Rënda dhe prokurori Arben Kraja, duke i dhënë përfundimisht vulën edhe SPAK-ut si një mashtrim primitiv i Qeverisë Rama.

Por Ibrahimi u mundua në mënyrën e tij komuniste të sqaroi arsyet pse ky proces u vendos të bëhej me dyer të mbyllura dhe jashtë syrit të kamerave:

“Intervistat janë regjistruar në audio dhe video, sepse ndonjëri kandidat mund të ankimojë vendimin tonë. KLP është e prirur të jetë e hapur. Ajo çka ndodhi sot, në intervista, ishte pjesë e një procesi administrativ, dedikuar shqyrtimit të kandidatëve. Sot konfirmuam gjetjet paraprake të komisionit. Kur të kemi gati relacionet për çdo kandidat, regjistrimet do bëhen në formë publike”, tha Ibrahimi.

Anomali tjetër e këtij procesi është kandidimi për SPAK i kandidatëve që nuk e kanë kaluar vettingun. Nga katër kandidatët e intervistuar sot vetëm prokurori Arben Kraja ka kaluar vettingun, dhe 10 nga 23 sa janë gjithsejtë; Ibrahimi u pyet pikërisht për këtë situatë nëse ata rrezikojnë të përjashtohen nga vettingu:

“Për fat të keq rreziku ekziston. Në përgjithësi aftësia profesionale dhe integriteti shkojnë krah më krah. Besoj që një prokuror që është profesional, është i vendosur në punën e tij, zor që çalon nga ana e integritetit. Sidoqoftë, procesi i sotëm synon të verifikojë profesionalizmin e kandidatëve, ndërsa procesi i vettingut synon të vlerësojë integritetin e tyre. Ekziston mundësia që këto dy procese të arrijnë në rezultate të kundërta në kuptimin që ne konfirmojmë dikë si një prokuror me profesionalizëm të lartë dhe nga ana tjetër vettingu të mos e konfirmojë për shkak të integritetit. Sidoqoftë kam besimin se në përgjithësi se këto dy procese do të shpien drejt rezultateve të njëjta.”

Kryetari i KLP u pyet nëse përfaqësuesit e OSBE dhe OBDAT do të ndikojnë në përzgjedhjen e kandidatëve, dhe përveç ai dha edhe një vlerësim të sinqertë se Këshilli i Lartë i Prokurorisë nuk mund të fluturojmë përtej gjetjeve të procesit. Pra, gjetjeve që duan ti shohin dhe larg syrit të kamerave:

“Patjetër. Ata janë pjesë e çdo etape të këtij procesi, kanë marrë pjesë në shqyrtimin e dokumentave të kandidatëve. Pikët i japim ne, por ne nuk mund të fluturojmë përtej gjetjeve të procesit,” tha Ibrahimi ndërsa u pyet edhe për çështjet e nxehta që prokurorët kanë pasur në dorë:

“Janë diskutuar dhe çështje që kanë të bëjnë me çështje konkrete penale, disa kanë qenë të famshme për publikun. Morëm një mendim të sinqertë nga kandidatët për vështirësitë që kanë hasur në këto raste dhe mënyrën si kanë reaguar. Për ne kjo është esenciale, nuk mund të falnim pa e korrur këtë produkt.”

Gent Ibrahimi u pyet dhe si u shprehën kandidatët, pse duan të jenë pjesë e SPAK, dhe përgjigja ishte epike dhe shumë larg realitetit shqiptar, aq më shumë kur kemi të bëjmë me figura pjesë e këtij sistemi të kalbur të drejtësisë i cili u akuzua më shumë se askush nga Edi Rama:

“Besimi që kësaj radhe do të jetë me të vërtet ndryshe, sepse ekzistojnë kushtet për prokurorët që të japin maksimumin. Ata kanë garancinë e qëndrimit në detyrë, kanë një mbështetje materiale dhe profesionale si kurrë ndonjëherë. Së fundi edhe procesi i përzgjedhjes. Kujtoni si zgjidheshin prokurorët për prokurorinë e krimeve të rënda dhe si po i përzgjedhim ne sot për SPAK, është nata me ditën. Besimi te procesi ishte një nga arsyet kryesore që ata u motivuan për të kandiduar.”

Ndryshe, procesi i intervistimit të 23 kandidatëve për Strukturën e Posaçme kundër Korrupsionit dhe Krimit të Organizuar, SPAK, do të zgjasë deri me 12 korrik. Pas intervistimit do të bëhet pikëzimi i 23 kandidatëve të mbetur në garë. Kryetari i KLP tha se SPAK mund të krijohet edhe me një numër minimal anëtarësh, edhe më pak se 10, në varësi të vendimit që do të marrë KLP.