Bloomberg: Kosova po ndërton ushtrinë, paralelisht me përpjekjet për njohje
Kosova po vazhdon procesin e ndërtimit të kapaciteteve të saj ushtarake, paralelisht me përpjekjet për njohje të plotë ndërkombëtare, shkruan Bloomberg në një artikull kushtuar Forcës së Sigurisë së Kosovës, FSK.
Sipas artikullit, Kosova ka investuar rreth 1 miliard dollarë në krijimin e ushtrisë së saj, ndërsa deri tani ka siguruar sisteme armatimi në vlerë prej rreth 460 milionë eurosh. Ministri në detyrë të mbrojtjes së Kosovës, Ejup Maqedonci, për Bloomberg thotë se këto investime janë hapa shumë, shumë të mëdhenj drejt krijimit të një force të gatshme për mbrojtjen e vendit dhe bashkëpunim me partnerët ndërkombëtarë.
Synimi, sipas tij, është që Forca e Sigurisë së Kosovës të ketë 5 mijë ushtarë aktivë dhe një sistem rezervistësh mbi baza vullnetare. Sipas tij, ushtria planifikon të zhvillojë kapacitete të mbrojtjes ajrore, artileri dhe helikopterë ushtarakë.
Artikulli rikujton se Maqedonci ka veshur tri uniforma gjatë 27 viteve të fundit: si pjesëtar i luftës për çlirimin e Kosovës, më pas në një forcë humanitare dhe tani si ministër i mbrojtjes që udhëheq transformimin e forcës ushtarake të vendit.
“Tri uniformat janë të vendosura në zyrën e tij në kompleksin e ministrisë në Prishtinë dhe simbolizojnë kompleksitetin e ndërtimit të një ushtrie në një shtet me njohje të kufizuar ndërkombëtare,” thekson Bloomberg, duke shtuar se paqeruajtësit e udhëhequr nga NATO vazhdojnë të luajnë rol kyç në ruajtjen e stailitetit.
Sipas Ministrit në detyrë të Mbrojtjes, ushtria e Kosovës po ndërtohet si forcë e gatshme për të mbrojtur Kosovën, qytetarët e saj dhe për të bashkëpunuar me partnerët.
Transformimi i FSK-së në ushtri, raporton Bloomberg, nisi tetë vjet më parë me mbështetjen e Shtetet e Bashkuara, Gjermanisë, Mbretërisë së Bashkuar dhe Francës.
Kosova tashmë posedon disa lloje dronësh dhe sisteme kundërtanke, ndërsa planifikon të sigurojë kapacitete të mbrojtjes ajrore, artileri 155 milimetërshe dhe helikopterë ushtarakë Sikorsky UH-60 Black Hawk.
Po ashtu, artikulli vë në pah se Kosova po nënshkruan marrëveshje bilaterale ushtarake me shtete anëtare të NATO-s, kryesisht me SHBA-në dhe Turqia, për avancimin e kapaciteteve mbrojtëse.
Ndërtimi i ushtrisë së Kosovës mbetet çështje e ndjeshme politike për shkak të kundërshtimit të vazhdueshëm nga Serbia, e cila nuk e njeh pavarësinë e Kosovës. Bloomberg citon shefin e Shtabit të Ushtrisë serbe, Milan Mojsiloviç, i cili ka deklaruar se KFOR-i mbetet formacioni i vetëm legjitim i armatosur në Kosovë.
Në fund, Blooberg duke cituar analistin e International Crisis Group, Marko Prelec, vlerëson se prioritet duhet të mbetet arritja e një marrëveshjeje afatgjate ndërmjet Kosovës dhe Serbisë.
