“Bomba e UEFA-s”/ Kukësi-Kastrioti 3-1, rezultat i trukuar për baste

“Bombë” nga UEFA, dy klube të tjera të Kategorisë Superiore u akuzuan se janë përfshirë në trukimin e ndeshjes së vlefshme për javën e 36-të të kampionatit të kaluar.

Bëhet fjalë për Kukësi-Kastrioti 3-1, e luajtur më 30 maj në fushën asnjanëse të Kamzës.

Pjesa e parë përfundoi 0-1 për krutanët pas golit të Erlis Ymerajt në minutën e 29-të. Ndërsa në 10 minutat e fundit të lojës, Kukësi arriti të shënonte tre gola, dy herë me Rexhinaldon (80’ dhe 90+1’) dhe një herë me Shkurtajn (85’). “Panorama Sport” ka zbuluar dje ekskluzivisht raportin konfidencial që UEFA ka dërguar në institucionin e futbollit shqiptar vetëm 24 orë pas zhvillimit të ndeshjes Kukësi-Kastrioti 3-1.

Më 1 qershor UEFA përmes sistemit të monitorimit të basteve BFDS, njoftonte FSHF-në se ka prova të qarta se rezultati i ndeshjes është luajtur në baste për qëllime përfitimi. Sikur të mos mjaftonte lënia në fuqi e dënimit me 10 vite të Skënderbeut, tashmë futbolli shqiptar vazhdon të damkoset nga historia e trukimeve, raporton “Panorama”. Natyrisht, kjo nuk është e parë që në FSHF vijnë raporte të tilla, sidomos në 10 vitet e fundit, por Komisioni i Etikës nuk ka marrë kurrë vendime konkrete.

Për këtë lajm kanë reaguar edhe klubet, me Kukësin që në faqen zyrtare ka deklaruar:

“FK Kukësi hedh poshtë akuzat për trukim të ndeshjes me KS Kastriotin, luajtur më 30 Maj 2019 në stadiumin e Kamzës, ku skuadra jonë fitoi me rezultatin 3-1 duke qenë ekip pritës për shkak të mungesës së fushës. Deklarojmë me përgjegjësi se nuk ka asnjë element që të vërtetojë këtë akuzë.

Ekipi ynë e ka patur jetike këtë ndeshje, për të siguruar vendin e dytë në Kategorinë Superiore dhe për të qenë i sigurt në pjesëmarrjen e kupave të Europës. Ndaj, impenjimi ka qenë maksimal nga skuadra dhe stafi. Ne sigurojmë Uefa-n, institucionet e futbollit në Shqipëri, gjithë opinionin sportiv dhe tifozërinë se jemi të hapur ndaj çdo hetimi dhe se FK Kukësi kurrë nuk është përfshirë në ngjarje të tilla që shëmtojnë futbollin dhe imazhin e Klubit.”

Ndërkohë në reagimin e Kastriotit , Klubi krutan, jo vetem që nuk mohon në asnjë rresht trukimin e ndeshjes kundër Kukësit, por sulmon gazetën “Panorama Sport” pse ka publikuar lajmin. Mund të duket qesharake, por ja që është e vërtetë!

Reagimi i plotë i klubit krutan në “Facebook”:

“Reagim kundër gazetës “Panorama Sport” dhe dashakeqësve që duan të prishin imazhin e Klubit tonë.

KS Kastrioti u njoh mëngjesin e sotëm me një tjetër shpifje të ndyrë dhe dashakeqëse ndaj nesh, nga gazeta “Panorama Sport” dhe palë të “dyta”. Siç tashmë është bërë zakon, kjo gazetë vazhdon të sulmojë vazhdimisht ekipin tonë, për interesa të saja, dhe palve të dyta që i shërben kjo si gazetë.

KS Kastrioti është i hapur të ballafaqohet me çdo fakt që i përket çeshtjes në fjale, dhe nëse kjo gazetë është aq serioze t’i publikojë të gjitha, dhe ne mbajmë përgjesi për gjithçka, po mesa duket kjo gazetë është e kapur, dhe e vënë në shërbim të dikujt.

Ne si klub do i drejtohemi organeve kopetente për prishje imazhi dhe do kërkojmë dëmshpërblim për trillime të tilla. Dhe i themi boll, s’lejojmë askënd të hedhi baltë mbi ne dhe ekipin tonë, në të kundërt do përballet ligjërisht me ne.
T’i vijë turp kësaj gazete që në vend të flasi për garë të rregull sportive që i dhuruam kampionatit vitin e shkuar merret me lajme boshe, ishim pikërisht ne që e zbukuruam Superligën sezonin që u mbyll dhe përfundimin e saj e pranuam me sportivitet, këto janë lajmet që duhet të pasyrojë kjo gazetë”.